Ganar, gastar y guardar

Conservadores, lliberales y socialistes. Los más de los países civilizaos —por dicir, los europeos— disponen de tres grandes grupos políticos organizaos. Y voi someter a la so consideración cualu d'ente tolos tres ye'l más aquello pa facese cargu de ca una de les tres actividades crematístiques que-yos propunxe más primero. ¿A que nun ye tan difícil? La intuición díznoslo claramente: los conservadores, como'l so nome indica, son más de calteneles perres; los lliberales anden más enfotaos en produciles; y los socialistes arréglense enseguida pa espardiles. ¿Y quién d'ente ellos tien la razón? Pues, na mio opinión, entrambos los tres: equilibriu, balance y estabilidá; esa ye la clave.

Seique por eso los parlamentos —y los gobiernos y los países— que meyor furrulen precisen de les tres pates p'asentar. Y cuando nun tienen más que dos acaben coxicando. Y los que namás disponen d'una, pa qué nos vamos engañar. Los americanos, por casu —los estaunidenses, pa ser más precisos—, como nun tienen namás que demócrates y republicanos, arréglense bien pa ganar y guardar les perres (neso son maestros), pero anden peor a la de distribuiles. Cómo será qu'hasta los asturianos ganamos-yos a la de disponer d'una sanidá universal y decente. ¿Y eso por qué? ¿Igual porque llevamos cuarenta años de socialismo gobernante? ¿Y, entós, a la de xenerar riqueza? ¿Qué tal nos va? ¿Úlos nuestros lliberales? ¿Per ónde coxica'l tayuelu políticu asturianu? Nun hai más preguntes, señoría.

Lo del equilibriu ye mui importante. Y aplícase, tamién, a la cultura, la educación o'l conocimientu científicu. Esto últimu, por dicir, precisa tres coses pa prosperar: crealu, rentabilizalu y espardelu. ¿Nunca sintieron falar de la I+D+i? Pues ye un poco eso la definición d'estes tres coses: investigar gastando perres en conocer, desenrollar espardiendo esi conocimientu, y innovar ganando dineru con ello. ¿Y quién ta meyor preparáu pa facelo? ¿Les empreses? ¿Los gobiernos? ¿O los científicos? Pues, otra vuelta, entrambos los tres; por dicir: los profesores dependiendo de lo público; los investigadores, metá-metá; y los inxenieros arreyaos a les empreses, les fundaciones, les starts-up y tou eso.

Tenemos qu'aprender que les democracies nun les construin –namás– los gobiernos; ye la xente la que-yos da forma –comerciantes, obreros, maestres, optometristes, policíes o cantantes– y por eso les llamamos democracies de tenderos: porque Amazon, Central Llechera, Tierrastur, Ikea, Astilleros Gondán, Reny-Picot o Novedaes Eloína nun les creó nengún gobiernu. Si lo ficiéremos, a la de decidir la nuestra ideoloxía o a quien vamos votar nun dibemos mirar namás pa les nuestres preferencies, maníes o porgüeyos personales; sinon pal nuestru momentu y el del país en xeneral. Y mirando pa la economía, la ciencia y el futuru del nuestru pequeñu y verde paraísu particular… ¿Qué cuenten necesitamos agora? ¿Qué nos fai más falta? ¿Ganar, gastar o guardar les perres? Pues seique les tres coses; pero tarán conmigo en que lo más que necesitamos ye ganar actividá económica y empléu. ¿Y por qué? Por equilibriu: porque tenemos poco y repartir lo poco, de poco val.

Toles democracies que prosperen precisen de tres pates y cuando falla una, el conxuntu enteru pierde estabilidá. Miren a ver qué pata echen en falta nel tayuelu políticu asturianu y verán más fácil por qué nos cuesta tanto prosperar.