Europeos de nación

Qué fácil y barato y inconsciente salía que los chinos s'encargaren de fabricar tolo nuestro, los americanos d'inventar tolo suyo y los rusos de vendenos el gas. Qué cómodo y que conveniente y qué mentira. Pues ya valió. Agora toca espertar y esconsoñar y pagar les deldes, que cuando queremos somos espabilaos bastante y otru día, si eso, falamos de la condonación autonómica.

Enquivocámonos. Y ya nun podemos siguir enfotándonos nos mesmos que quieren desfacenos la bolera. Somos europeos de nación, nacimos equí, y les brabuconaes en contra d'Ucrania y Zelenski y Canadá, y tolo que se mueve, van en contra nosotros. Pero somos civilizaos, y el problema nun va ser qu'ún de cada tres eurodiputaos seyan euroescépticos, eurodisolventes o, directamente, portavoces de la Casa Blanca o del Kremlin. Porque somos demócrates y hasta nel parlamentu español tenémoslos en contra la constitución, la monarquía o, directamente, la soberanía. Igual que nel asturianu hailos en contra la oficialidá, l'estatutu o, directamente, l'autonomía. La cuestión, poro, nun ta nes minoríes negacionistes; el gran problema ye siempre'l silenciu los xustos, o la cobardía los prudentes. Y por eso toca falar claro.

Necesitamos un exércitu européu. Y una industria propia. Y una fiscalidá común. Y una banca central. Y más músculu tecnolóxicu. Y una clase trabayadora arguyosa. Y pa eso, compatriotes, vamos tener qu'instalar parques de bateríes, abrir mines d'oru y nun cerrar aceríes. ¿O contamos volver a nun pagar les factures y querer la carne ensin güesu?

Somos europeos de nación, non tontos de refalfiu. D'antiguo tenemos una educación, una sanidá y un patrimoniu que son la envidia del mundu. Y de sobra sabemos cómo tener industries ensin empuercar los ríos; modernizar infraestructures ensin achaplar trabayadores y caltener el nuestru bientar ensin afogar la llibertá. Debémos-yoslo a los nuestros padres fundadores.