Donald y lo nuestro

La primer de les cuatru foles que nos van anubrir ye la de subir aranceles; sobre manera a China, anque tamien a Europa; y tonteríes poques: esto ye una guerra –dizque comercial– y va mui en serio. Y tendríemos que retrucar como europeos: non como progresistes o conservadores, y menos como lliberales; porque aquello ye cualisquier cosa menos lliberal, demócrata o republicano. Ye tolo contrario y de nosotros va depender ser víctimes o actores.

La segunda gran medida trumpista va ser baxar impuestos a les empreses americanes. O a les asitiaes allí. Y vuelvo a lo mesmo: tontos seríemos si nos dexáremos llevar poles discusiones ideolóxiques y nun supiéremos reaccionar como europeos. Y mesmo va pasar cola tercer pata: la de suavizar la regulación. ¿Pa conseguir qué? Pues, de mano, pa ganar apoyos: namás cola expectativa, la bolsa americana, les criptomonedes o les acciones de Tesla anden disparaes. Tolo contrariu de les bolses europees. Y ya, pa cuadrar lo d'America first, la cuarta midida va ser echar inmigrantes. Y si toca apautar con Venezuela, o col diañu mesmu, va facelo y ya ta: por simple ufierta y demanda los salarios van subir, y los precios, y la inflación, y el valir del dólar; lo que –con toles contradiciones del mundu– va trae-y l'aplausu de la clas trabayadora americana

¿Y la europea? Pues la clas trabayadora europea, a veles venir, regulando y viendo como l'aceru anda mal. China fabrica, América inventa y… ¿nosotros? ¿Lexislamos? ¿Y por qué nun fabricamos? ¿O innovamos daveres? ¿Polos costos? Mentira. ¿Poles regulaciones? Mentira tamién. Na mio aldeana opinión, ye namás que cosa d'actitú, de mentalidá, de ponese a ello y –en baxando a la cosa nuestro– de ver qu'agospiar equí la colección d'arte de Pérez Simón nun nos queda grande, que criar y matar equí los nuestros xatos, en cuenta vendelos a los d'afuera pa compra-yoslos después, ye lo normal y –en xunto– de dexar de ser tan provincianos pa entamar a ser un aquello más valientes.

Ficimos bien de coses; como europeos, digo: el mercáu común del carbón y l'aceru, la moneda única, o el festival de la canción. Pero, seique por falta de xeitu y ambición, dexamos afuera les telecomunicaciones, la banca o la enerxía. Y tamién l'armamentu. Y enfotaos nos nuestros propios enguedeyos reguladores, dependemos demasiau de los americanos, de la OTAN, y de China. Y tamos pagándolo. Y ya nun lo digo yo: ponlo l'informe Draghi.

Toles clases trabayadores quieren más soluciones (básicamente trabayu) y menos discursos. Equí sabémoslo bien: la descarbonización acabó n'estafa, subvencionadores y subvencionaos marcharon colo nuestro, ficiéronse ricos y dexáronnos probes, desarmaos y acomplexaos. Y ya valió de que –col nuestru buenismu– les élites de Pekín y Nueva York sigan medrando y contaminando'l planeta, mientres aldericamos si defender lo nuestro con más aranceles.

Porque la repuesta ye sí: la nuestra industria precisa que la defendamos.