Delda histórica

Si de verdá queremos negociar –con eficacia– la nuestra financiación, debemos repunar menos y asumir más. De mano, más competencies

Inaciu Iglesias

Gijón

Miércoles, 21 de agosto 2024, 02:00

Si vamos negociar, vamos negocialo bien. La financiación autonómica, digo. Pa entamar, tenemos qu'asumir que la delda histórica asturiana cobráronla ya unos delincuentes. Tarde, ... mal y nunca, como tolo d'ellos, los señores Villa y Vitorino —delincuentes confesos, nun condenaos lo bastante— pasaron bien d'años recaldando pa ellos bien de pagos a costa la nuestra minería: una delda —histórica— en sangre, muertos, escombreres, votos y apoyos qu'ellos monetizaron (a cuenta de nun sé qué «compromisu solidariu coles cuenques») en forma de prexubilaciones, chequeres, subvenciones y fondos millonarios, siempre cargu a reindustrializaciones, reconversiones y descarbonizaciones que nunca llegaron. Y hasta que nun atalantemos esto nunca vamos avanzar.

Pero nun me malinterpreten. Paezme la cuenta que l'alcaldesa de Xixón, la señora Moriyón, tenga abierto'l melón de la nuestra delda histórica énte'l ministru del ramu. Ye de xusticia. Si falamos d'agravios comparativos, de financiación y de pautos de socialistes y republicanos, nun queda otro que contar cola nuestra voz. Y voi más p'allá; de nada nos val quedar a medies: pa ser eficaces, los nuestros argumentos nun puen quedar en repunar con que los asturianos tenemos muncha historia y munchu territoriu y poca población, y que, por otro, los catalanes tienen munchu cuentu, demasiaos votos y bastantes diputaos. En política les propuestes tienen que dar na diana.

Sí de verdá queremos negociar —con eficacia— la nuestra financiación tenemos que repunar menos y asumir más. De mano, más competencies (por dicir, les cercaníes); más recursos (recaldando y armonizando los nuestros impuestos, non pidiendo qu'otros lo faigan); más protagonismu (más sedes descentralizaes y menos chiringuitos inventaos); y, en poques palabres, más responsabilidá y menos protestes adolescentes: somos una nacionalidá histórica y valió ya que les nuestres deldes —históriques— y los nuestros fondos —mineros— los tengan cobrao y xestionao delincuentes, en cuenta empobinalos nosotros dende les nuestres instituciones democrátiques.

Y d'esti despropósitu son tamien responsables los pagadores. Vamos decilo claro: a Villa, dende una empresa estatal, ingresáben-y na cuenta los importes de toles hores sindicales del SOMA. Y a Vitorino, dende un ministeriu español, pagáben-y subvenciones, fondos y ayudes millonaries a cuenta los cientos de nómines qu'amenazaba desatender, les repoblaciones de montes que, directamente, falsificaba y les tonelaes de carbón que marafundiaba pa vender elli mesmu per detrás. Podemos tener tol respetu'l mundu a los sindicatos mineros, a los empresarios y a los trabayadores que dexaron en pozu vida y pulmones. Pero hasta que nun llimpiemos esto poco vamos facer.

Esta selmana d'atrás la nuestra Xunta Xeneral discutió si-y prestaba esti últimu pautu d'investidura del presidente de Cataluña. A min –qué quieren– pareciome una perda de tiempu; y una manera –afayaiza, eso sí– d'aparentar facer aldericando en casa ayena. Y entiéndanme, nun ye que nun m'importe lo que pase en Barcelona: viví allí y conozo enforma l'idioma y la mentalidá. Lo que me repuna ye que, negociación tres negociación, los usemos en cuenta mirar pa lo de casa.

Puigdemont escapó de la xusticia y ye una vergoña. Pujol robó nun sé cuánto y sigue na cai. Illa negoció coles nuestres perres y fuimos a la so investidura. Val. ¿Y Villa? ¿Cuántos años lleva Villa robando, negociando y mareando la perdiz col so síndrome confusional? ¿Y Vitorino? ¿Úles perres de tantes ayudes –falses– y tantu carbón –verdaderu– del que nunca supimos? ¿Qué pinten entós les nuestres instituciones denunciando, en plena negociación autonómica, lo mal qu'anden les coses a mil kilómetros y callando tolo que tenemos en casa?

Menos voces en castañéu y más proyectu y definición. Somos una nacionalidá histórica y si de verdá queremos ser eficaces vamos tener que xugar meyor les nuestres cartes.