Dar y pidir

Pasa en toles provincies, pero —han guardame'l secretu— nun pasa tanto nes naciones, o nacionalidaes. Y ye normal: con tantu complexu d'inferioridá los provincianos cuenten nun tener nada que dar, y sobreactúen a la de pidir. Y mídense con otros polo fuerte que son a dar, col puñu, na mesa negociación; ensin caer na cuenta qu'esa unidá de midida nun val: nun ye nada práctica. Lo que marca la diferencia ye arriesgar, invertir y apostar.

Como asturianos, a la de traer inversores… ¿Qué preferimos? ¿Que les cien mayores fortunes del nuestru pequeñu y verde país sigan tributando equí y, sobremanera, multipliquen el so capital tresformándolu en trabayu y prosperidá? ¿O que quede mui claro qu'a los nuestros ricos, bien d'ellos pijos herederos, nun-yos pasamos nin una y preferimos dexalos marchar? ¿Cuánto ingresaríemos nel primer de los casos pa caltener los servicios públicos? ¿Y cuánto nel segundu? ¿Y cuánto perderíemos pal futuru?

Vamos facer comparaciones: Bilbao tien el so Guggenheim; Coruña, Inditex; Santander, la Fundación Botín… ¿Y nosotros? Pues nosotros tenemos que facénoslo mirar, porque'l Niemeyer y el Calatrava nacieron d'una estafa, la Fundación Masaveu marchó pa Madrid (impuestu de sucesiones mediante), los palacios del señor Madera nun terminen de restaurase ¿de verdá por pilancos alministrativos?, y la colección Pérez-Simón —¿por falta d'ambición?— pue acabar afuera d'Asturies. Y ye que —anecio— como nun contamos dar bien, nunca nos sal lo de pidir.

¿Qué podemos dar nosotros a los ricos? ¿Cuándo vamos entender que les grandes fortunes nun piden dineru? ¿Hailu que cuente que Pérez Simón quier perres pa traer equí la so colección d'arte? ¿Y cómo atraer empreses? ¿Thyssen, Amazon, Dupont, Bayer o Mittal necesiten les nuestres perres pa invertir equí? ¿Central Llechera, Alvargonzález, Reny-Picot, Gondán, Samoa, Trabanco, Masaveu, Valle Ballina, Daniel Alonso, TSK, Asturfeito, Aleastur o Novedades Eloína precisen les nuestres perres pa siguir equí? ¿Entós qué ye lo que piden toos ellos? Pues, compatriotes míos, dos coses namás, y siempre les mesmes: impuestos xustos y burocracia normal.

¿Y la Unión Europea y el Reinu d'España qué piden p'apurrir equí les sos ayudes? ¿Nun será tamién lo mesmo? Pues sí. Y siguimos perdiendo demasiau'l tiempu en burocracia y nun vamos a lo práctico. ¿Tamos siendo capaces de llevar a la Unión proyectos sólidos y en xunto? Non ¿Somos quien a dar al Reinu dalgo d'estabilidá parlamentaria o un discursu políticu d'altor? Tampoco. Por eso deberíemos centranos en dar eso: soluciones; porque ta mui bien tramitar una llei especial pa proyectos estratéxicos y nun se qué más. Pero, a lo último, lo importante ye'l resultáu: lo que damos. ¿Vamos dar problemes o soluciones? ¿Vamos tener que convencer al últimu repunante del últimu departamentu de la última subsecretaría, o vamos ser razonables? ¿Vamos facer esperar meses, y años, pa cada permisu solicitáu o vamos ser prácticos?

Nun ye que, como asturianos, nun sepamos pidir. Ye que nun sabemos dar. Los nuestros políticos (provincianos) namás que lloramiquen: que si el vial, la ronda, l'autopista, la variante, los fondos, los cuadros o los impuestos… Pa consiguir bien poco ¿Y por qué? Porque necesitamos otra cosa: precisamos líderes con idea de país —non de sucursal— que s'atrevan a decidir, arriesgar y dar. Y entós empezaremos a recibir.