¿Quién da'l preste?

Na mio opinión, a la d'agospiar inversiones, andamos mui, pero que mui, despistaos. Mirando namás pa un periódicu d'esta selmana veleiquí lo que tratamos: la mina d'oru (y nun ye metáfora) de Tapia, el parque d'Almacenes n'Uviéu, l'ária loxístico onde l'aeropuertu, l'hipermercáu de Costco, la planta d'amasueles en Villaviciosa, la Ería del Piles o los parques de bateríes ya nun sé pa ónde. Siete casos que s'enseñen a ver si-yos damos el parabién, o non. ¿A qué tamos xugando? ¿Quién-yos da'l preste a estes inversiones? ¿Los alcaldes? ¿Los diputaos? ¿El gobiernu? ¿Qué mazcarada de seguridá xurídica ye esta? ¿Contamos atraer asina proyectos y empléu?

Vamos dicilo claro: queremos empreses guais pero esta nun ye la manera. Lo más que precisamos de les nuestres industries ye que cumplan la llei. Puntu. Valió de pidi-yos que seyan prestoses, modernes, dixitalizaes, sostenibles, rurales, 4.0 y bien curioses. El progresu necesita enfotase y pa eso l'ordenamientu xurídicu tien que vese claru dende lo primero. Porque, a lo último, los que terminen sacando les castañes del fuéu son siempre los mesmos: los tenderos, autónomos, ganaderos y llagareros a los que tanto despreciamos por antiguos que nun saben competir y acaben de patrimoniu cultural inmaterial de la humanidá.

Nun podemos dexar que ganen siempre los mesmos: los americanos, digo. Como europeos, nun podemos siguir calteniendo tantos prexuicios en contra'l capitalismu que nun nos permiten espabilar. La llibertá precisa de regles de xuegu clares. La convivencia tamién. Y la rentabilidá más tovía. Olvidemos la llei de la xungla y si de verdá contamos atraer inversiones, bayura y empléu tenemos qu'atrevenos a ufiertar seguridá: seguridá xurídica, económica y política. Lo otro ye caciquismu.