Bable nes empreses

Tol mundu somos un poco turista. Yo mesmo veraneo na costa; como los ricos y, buenu, tamién como los pescadores. Y voi a les pescaderíes; y a les carniceríes, y a les cafeteríes, aparcamientos, restaurantes, fruteríes, supermercaos, ferreteríes, bancos, asesoríes, concesionarios y hasta a les inmobiliaries. Y nesi andar míu —ya me perdonarán— plasmo colos nomes, vezos y costumes que nos va imponiendo, añu tres añu, el nacionalismu obligatoriu. Nun sé si por culpa los turistes, el cambiu climáticu, la ideoloxía woke o lo tontos que somos, lo que tola vida llamamos pixín, andarica, xarda o ñocla, agora abulten ser rape, o rapito, nécora, caballa y… ¿masera? Y después dirán que'l pescáu ye caru.

Pero nun me malinterpreten; nun tengo nenguna manía especial colos pexes, los mesetarios o los guiris: gústenme los idiomes, tengo visto mundu, y esto nun va de ver quién ye más auténticu. Por descontao entiendo los sistemes de distribución y loxística, les economíes d'escala, el drechu de propiedá y la necesidá d'entender y facese entender cara al públicu. Y a la de llamar a les coses pol so nome, albidro más que de sobra que si una pescadería tien, por dicir, quince tiendes pa en Torrelavega y alredores pero namás que dos n'Asturies, va acabar centralizando la impresión de los cartelos poniendo 'masera' en cuenta ñocla o lo que seya. Ye'l mercáu. Y la pregunta del millón ye si una empresa asturiana —agora que tamos a piques de celebrar el día de la nuestra patria querida— va etiquetar como andarica, oriciu o gochu asturcelta lo que cuenta vender, tamién por dicir, pa en Bermeo y alredores.

Nun ye personal, son negocios. Y a los negociantes, hosteleros, chigreros y comerciantes en xeneral, digo: si queremos una economía de calidá y un empléu de calidá y un turismu de calidá tenemos qu'empezar por defender un productu de calidá —nosotros y el nuestru paraisu natural— y vender bien, y caro, lo que somos. Lo contrario, poner en baratu quién somos y cómo nos llamamos, ye peor qu'un crime. Ye un error. Empezamos tapeciendo'l nome de Les Arriondes «pa nun confundir a los turistes» y vamos acabar llamando Lanas, Cabralas o Manzaneda a Llanes, Cabrales y Pumarín polo mesmo: la mesma tontería pola que dicimos Gamonedo, rapito o llovizna y celebramos Halloween, oktoberfest o la feria d'abril.

Más gorda nun cabe en práu. Tar arguyosu d'Asturies pol paisaxe, el mar, les montañes y la Santina y despreciar asina la nuestra manera de ser y dicir les coses ye una incongruencia total. Llamar pixín al pixín nes cartes de los nuestros restaurantes nun ye una manía de cincuentón. Insisto, son negocios: si queremos que les nuestres empreses y les nuestres cotizaciones medren y seyan sostenibles, tenemos que vendenos meyor y recibir, con dignidá, a los visitantes: industriales, llaborales o turísticos. ¿Por qué? Porque son clientes ¿Vien una multinacional y busca trabayadores? Ofrezcámonos con dignidá. ¿Salimos nosotros afuera a ufrir los nuestros productos? Vendámoslos con dignidá. ¿Recibimos turistes y viaxeros? Enseñémos-yos lo que somos y tenemos con dignidá; con naturalidá: llamando a les coses pol so nome, ameritando-yos el preciu y nunca, nunca, vendiéndonos a baratu.

Porque'l patriotismu nuestru —asturianu y queríu— tamién ye eso.