Autónomos, non dependientes

Naide cuenta colos autónomos. Empezando poles autoridaes, tol mundu dispara al pianista gobiernu tres gobiernu, a posta o ensin querer, decreten en contra d'ellos. Por dicir de va poco: la xornada llaboral, los alquileres, la banca, la paternidá, los tramos, el teletrabayu, l'absentismu y ya ven per ónde voi… ¿Cuenten vustedes que dalgo d'esto ta fecho mirando polos autónomos? ¿Piensen que tanta burocracia importa-yos a les multinacionales? ¿O saben más bien qu'a los que torna ye a los profesionales, carpinteros, asesores, camioneros y demás, que bastante tienen ya?

Nun hai manera, mesmo con unos que con otros toles facilidaes van pa los grandes. Y agora qu'el mundu ta camudando tanto, caemos na cuenta que toca mirar más por nosotros, pola nuestra defensa, les nuestres finances, la nuestra enerxía y la nuestra tecnoloxía; y que o somos más autónomos o vamos pasalo mal. O, como acaba amenazar Elon Musk a los ucranianos cola so diplomacia repunante: «Portaivos bien o desconéctovos».

Si nun queremos que nos desconencten toca ser autosuficientes, amenorgar les subvenciones y enfrentase a los abusones; y pa eso precisamos ser más autónomos. De poco val aneciar con que les empreses tienen que crecer, internacionalizase y modernizase si escaecemos que tolo grande nació pequeño, tolo xeneral empezó local y tolo recién arrancó antiguo. O curiamos a los autónomos o vamos fundir pola base. Y nun ye cosa d'ideoloxía, simplaya, de drecha o de manzorga. Miren: nun va tanto, los de siempre, los del réxime, la xente d'orde, yeren los de dereches; y los otros, los revoltosos, los revolvinos, o los revolucionarios, yeren los d'izquierdes. Agora parez tolo contrario: los qu'anecien con regulalo too y nun quieren esbarrumbar nada son los progres; y los que parez que quieren acabar cola OTAN, la Unión Europea, y hasta'l bable son los de dereches.

Por eso, en tiempos de tribulación como estos, toca volver a lo de siempre: al trabayu pequeñu, los llabores de la casa y los nuestros héroes autónomos; namás asina vamos ser grandes.