Una imaxe tapecida

En 'Retour à Reims [Fragments]' -una de les películes más importantes de la temporada-, Jean-Gabriel Périot avérase a la historia de la clas obrera en Francia, a la so cultura, a los so vezos políticos y a la so vida cotidiana, al tiempu que reflexona sobre la historia de la representación mediática d'esa mesma clas. Tola película ta construyía con imáxenes d'archivu del cine y la televisión que se ponen en relación (dialéctica) cola llectura de dalgunos fragmentos del ensayu 'Retour à Reims', del sociólogu Didier Eribon, un llibru impresncindible pa entender dalgunes de les coses que nos pasen. Preparando la película, Périot constató como la imaxe del proletariáu desapareciere de les pantalles nos años ochenta del sieglu pasáu. Col arranque de la década, la televisión reinvéntase y conviértese no que ye agora, una caxa de resonancia pa los porgüeyos de la clas dominante: «Los trabayadores tienen, de xemes en cuando, derechu a una noticia breve, cuando hai una fuelga por exemplu, pero esto ye cada vegada más escepcional, y el puntu de vista poques vegaes ye'l de los trabayadores, sinón el de los patrones». Esta realidá ye la mesma cuando mira pal cine. Chócase Périot de la desapaición de la representación de les vides precaries na ficción y nel documental. Nel cine comercial y nel cine d'autor. Cola nacencia d'un cine -de y pa la- «clas media», yá nun se producen películes pa -y representando la vida de- les clases populares: «Ye como si la enerxía militante de finales de los 60 desapaeciere, en parte pol cansanciu, pero tamién poles múltiples renuncies de la izquierda nel poder», conclúi Péirot.