Facer país

Otra manera, el 8 de setiembre, marca l'empiezu del nuevu cursu políticu y del periodu de sesiones parllamentaries. Trescurríu yá más d'un añu desque escomenzó la llexislatura ye tiempu de pidir resultaos y esixir al gobiernu concrecciones apalpables na so acción político-alministrativa. Les intenciones y previsiones tienen qu'empezar a materializase en fechos comprobables, les palabres han de convertise en realidaes. Nesti próximu cursu van tratase na Xunta Xeneral asuntos de calter perimportante pa definir el modelu de país al que s'empobina Asturies, ente ellos la reforma de la Llei de Turismu, l'aprobación de la Llei de Proyectos Estratéxicos o la promungación de la de Les Escuelines, por nomar namás tres que nos meses venideros van discutise nel nuestru parllamentu. Normatives qu'han valir pa dir definiendo l'Asturies del futuru en campos como'l tipu d'actividá turística que necesitamos -alloñada de la sobreesplotación y la masificación-, la productividá empresarial y industrial -que nun repita obres mastodóntiques como la del Muselón o proyectos vacíos como'l de la ZALIA- y los derechos sociales -como'l de la conciliación y el de la compatibilidá paterno-maternal col exerciciu llaboral-. Per otru llau, un modelu de país tien que tener el so reflexu nos Presupuestos Xenerales, pa lo qu'hai que tener bien claro los oxetivos y les prioridaes, adecuando les partíes económiques a ellos y algamando un bon desarrollu y execución d'eses cuentes; esto precisa una alministración engrasada y áxil que nun s'empatone con una burocracia escesiva y estéril. Los presupuestos actuales foron históricos pol so volume (más de 6.300 millones), nunca enantes contamos con tal cantidá de recursos. Dalgo que nun va volver a repetise al nun contar nesta ocasión con fondos europeos como los Next Generation, polo que nun queda otro qu'afinar bien y incidir nes necesidaes reales de los asturianos y asturianes. Ente elles rescampla una que pa nós tien que ser prioritaria y fundamental nes cuentes y na acción de gobiernu na presente llexislatura, trátase de la vivienda, una materia poliédrica y tresversal onde les haya, abarcando asuntos como'l de les hipoteques, l'alquiler, la construcción, los pisos turísticos o la emancipación xuvenil. Esta cuestión ha de convertise nún de los exes de los próximos presupuestos, posibiltando la implementación d'acciones valientes y estructurales nesti campu. N'otru sentíu, han ser unes cuentes que prioricen a les persones y cuiden al territoriu; que faigan país nos servicios sanitarios, nes comunicaciones, na industria, nos derechos sociales, nel medioambiente, na cultura...

El colectivu y votantes a los y les que represento movémonos nesta onda y creyemos necesario pasar del asturianismu teóricu al prácticu, dándo-y una dimensión política clara y identificable. Por ello, tamos nun procesu d'autoorganización y de creación d'estructures que nos afiance como corriente política de futuru, con vocación d'incidir nel devenir de la nuestra comunidá, faciendo política por y p'Asturies, una marca propia d'esta tierra, abierta a la collaboración con otros sectores sociales y políticos. Creyemos que n'Asturies ye'l momentu de facer país en tolos ámbitos y ensin complexos, toca falar de soberanía social, d'afondar na democracia, na participación ciudadana, d'aumentar derechos civiles, de recuperar l'autoestima colectiva, d'apostar pola nuestra identidá, de facer una sociedá más solidaria y acoyedora, d'igualdá real ente asturianos y asturianes... Aspiramos a convertir el sentimientu d'apegu a esta tierra y la voluntá de progresu de los y les sos habitantes n'enerxía política. Nello tamos. Bon Día d'Asturies.