El cocineru y les imáxenes

Radio Mozambique, 1979. El dirixente independentista y cineasta Sol de Carvalho diz-y a Jean-Luc Godard: «Nun país como'l nuestru, onde nun hai tradición de la imaxe...». Godard córtalu enantes que remate la reflexón: «Nun ye verdá que nun tengáis esperiencia de la imaxe: un neñu, malapenes abre los güeyos, yá ve imáxenes. Un campesín analfabetu ve'l sol, les flores, les montañes, ve'l banzáu de Cahora Bassa. Nun tien la esperiencia de la postal, la fotografía que reproduz el banzáu, pero eso nun significa que nun sepa facer imáxenes». Godard defende que Mozambique tienen tanta tradición de facer imáxenes como cualquier otru pueblu, incluso más: «Porque l'80% de los mozambiqueños nun saben lleer nin escribir y, poro, tienen que deprender cómo facer la imaxe d'un país, cosa que nun pasa n'Europa nin n'América, onde hai yá tantes imáxenes...». Godard asegura que crear imáxenes ye pa les persones tan natural como facer la dixestión. Saber usar eses imáxenes en dalgún sentíu ye un tema distintu, pero toles persones son quien a traducir la realidá n'imáxenes. De fechu, ye lo que faen constantemente na so relación col mundu visible. Lo que pue xenerar más problema ye tener idees sobre qué facer con eses imáxenes. De Carvalho pregúnta-y si cree que decidir cómo tresmitir una imaxe ye una elección ideolóxica. Godard contésta-y: «Ye un problema que tamién tienen los cocineros: anque tengan munches perres, muncha fruta o muncha carne, nun lo van usar too nun platu namás. Van dicir: güei llunes voi facer esto, mañana martes esto otro... Ye una elección mui complexa que tien de facer. Nesti sen, podríemos dicir que tou cocineru ye un bon cineasta».