Arte proletario

El periodista y escritor Juan Antonio Cabezas cita a León Trotski: «L'arte pal proletariáu nun pue ser un arte de segunda clas. Son peligroses dalgunes espresiones como cultura y lliteratura proletaries, porque traten de forciar al porvenir de la cultura dientro l'estrechu marcu del güei, falsifiquen les perspectives, perturben les proporciones, tuercen les midíes y cultiven la peligrosa suficiencia de los círculos pequeños». Failo pa dir a la contra de les idees que notaba que se diben enquistando nel llinguaxe de les organizaciones obreres de l'Asturies republicana y, lo que-y paecía tovía pior, en dalgunes mentalidaes simples qu'aceptaben ensin escrúpulos de sensibilidá -¿cómo diben tenelos?- la última teoría disparatada que ponía en circulación la pedantería inepta y ignorante. Concretamente, fai referencia a los que se dio en llamar 'arte antifascista'. «Antifascista, ¿por qué?, ¿por malo?», pregúntase l'autor de 'Catorce meses de guerra civil en Asturias': «El pior de los fascismos, el más reprochable sería'l de facer un arte malo destináu a los proletarios. Esta ye la más burguesa y perversa concepción de la misión del arte na revolución. La pior dictadura que pue sufrir la sensibilidá d'un pueblu ye la de los pseudoartistes qu'escriben o pinten patochaes y pretenden faceles pasar cola etiqueta d'arte pal pueblu, arte proletario, y, nos nuestros díes, arte antifascista». A la conclusión que llega ye que nun pue haber arte antifascista nin arte proletario: «Namás hai un arte pobre, llocalista, d'actualidá, perecedero. Y hai arte consiguío, clásico, universal, ensin fecha y etenro. El primeru pue ser fascista o antifascista, burgués o proletario, pero l'otru non. L'otru ye siempre rebelde, anque nun quiera, va siempre contra les formes y los conceptos petrificaos poles rutines».