¿Los xixoneses falen playu o amestao?

Hai demasiaes llingües n'España?, ¿ye l'asturianu una d'elles? ¿en que s'estrema un dialectu d'una llingua?, ¿el playu ye lo que falen los xixoneses? Estes son delles cuestiones que se respuenden nel trabayu de campu entamáu polos investigadores del Seminariu de Filoloxía Asturiana de la Universidá d'Uviéu, Ramón d'Andrés Díaz y Miguel Rodríguez Monteavaro: 'La diversidá llingüística d'España y d'Asturies. Encuesta na ciudá de Xixón, 2017' (Trabe) qu'acaba ver la lluz. El proyectu inxértase na llamada dialectoloxía perceptiva, que tenta recoyer les opiniones de los ciudadanos corrientes respective al so entornu llingüísticu. L'oxetivu ye, desplica'l profesor d'Andrés: «Ver cómo esi tipu de conocencies ye asimiláu pola xente, qué percepción tienen d'esos fenómenos o la calificación de la so fala y les de los demás».

La encuesta, afirmen los autores, valió pa testar delles intuiciones que pescudaben, amás de constatar que «la xente en xeneral tien clares les cuestiones que prueba la ciencia o cómo furrula llingüísticamente'l país», apunta Rodríguez Monteavaro. En total fueron 36 preguntes feches a un conxuntu de 60 persones d'estremaes edaes, xéneru y formación del ámbitu urbanu xixonés. Les respuestes dieron datos como que'l 66,7 de los entrevistaos asitiare l'asturiana como una llingua más d'España, al enumerales. O en cuantes a si 'bable' y 'asturianu' son equivalentes, el 36 por ciento ta d'alcuerdu frente a un 46 que los considera diferentes. «Sicasí cuando se pregunta poles diferencies -matiza Ramón d'Andrés- hai abondes valoraciones neutres: el 26 cree que'l bable ye una variedá del asturianu y el mesmu porcentaxe que tien una marca negativa: 'porque nun me presta', 'ye despectivo', etc. Resalta tamién la masa del 36 por cientu que nun sabe o nun contesta esta cuestión».

Menos duldes parez haber no que se refier a la distinción ente llingua y dialectu. Asina el 38 por ciento caltién qu'un dialectu nun ye más que la variante d'una llingua y un 36 que se trata d'una fala d'ámbitu más reducíu qu'un idioma. La percepción suxetiva dexa datos sorprendentes como'l de la comparanza de la nuestra llingua con otres: cuando se pregunta si l'asturianu tien munches diferencies col castellanu, el 58 por ciento respuende que son poques y sube al 70 nel casu del gallegu. Empara de la que se plantea a los encuestaos qué idioma s'asemeya más al nuestru -tomando como referencia la fala de Llantones, en Xixón- el 78 por ciento respuende el gallegu frente a un escasu 16 que escueye el castellán.

A los amigos de los llocalismos plasmará-yos saber qu'a la pregunta de qué llingua se fala en Xixón hai un 41 por cientu que lo considera una manera de falar asturianu o bable, frente a un 18 que lo conceptúa de castellano o español y un 36 por ciento como amestao d'entrambes llingües, mientres respuestes como 'playu' o 'gijonés' nun algamen el 2 por cientu.

Otra de les cuestiones poles que se pide opinión ye si se cree que n'España hai munches o poques llingües: el 52 por ciento considera que son la cuenta y un 33 que son demasiaes. A la pregunta concreta de si la diversidá llingüística nel nuestru país ye bona o mala, el porcentaxe de lo primero algama'l 80 por ciento.

La conclusión principal resúmela Rodríguez Monteavaro: «Lo más positivo del trabayu foi ver cómo casa la llingüística 'popular' y la científica. La mayor parte de la xente ye quien a identificar les distintes formes de falar, estrema llingües y dialectos o tien claro que l'asturiano ye un idioma al marxe del so nivel llegal».