Sherlock Holmes: la lliga de los azafranaos

Pasé a ver al mio amigu, Mr. Sherlock Holmes, un día na seronda del añu pasáu, y topélu fundíu nuna conversación con un caballeru forníu, de cara colorada y pelo azafranao como'l llume. Disculpéme pola intrusión, y taba a puntu de marchar cuando Holmes me metió abruptamente pal cuartu y zarró la puerta tres de min.

-Nun podía venir en momentu meyor, mio queríu Watson -dixo cordialmente.

-Tenía mieu de que tuviere enguedeyáu.

-Toilo. Muncho, de fechu.

-Entós puedo esperar nel cuartu d'allá.

-De nenguna manera. Esti caballeru, Mr. Wilson, foi'l mio compañeru y axudante en munchos de los mios casos más exitosos, y nun tengo dulda de que va ser de muncha utilidá nel casu de so tamién.

El caballeru forníu medio llevantóse de la siella y sacudió la cabeza pa saludame, con una rápida güeyada inquisitiva nos sos güeyinos arrodiaos de grasa.

-Pruebe'l sofá -dixo Holmes, achucándose en sillón y axuntando les yemes de los deos, como yera'l so vezu cuando taba pa xulgar daqué-. Yá sé, mio queríu Watson, que vusté comparte'l mio amor por tolo que ye estraño y ta acullá de les convenciones y de la rutina monótona de la vida diaria. Vusté amosóme'l so gustu por ello pente medies del entusiasmu col qu'entainó a rexistrar y, si me disculpa que lo diga, cásique aguapar munches de les mios pequeñes aventures.

-Los sos casos foron de gran interés pa min, efectivamente -comenté.

-Remembrará que yo señalé esti día, xusto primero de metenos nel cenciellu problema presentáu por Miss Mary Sutherland, que por efectos estraños y combinaciones estraordinaries tenemos dir a la vida mesma, que ye siempre muncho más atrevida que cualesquier enfotu de la imaxinación.

-Una proposición que yo me tomé la llibertá de cuestionar.

-Fíxolo, Doctor, y sicasí vusté ha convenir cola mio visión, pues otra manera voi siguir apinándo-y enriba fechu sobre fechu hasta que'l so maxín ruempa embaxo d'ellos y reconoza que yo tengo la razón. Agora, Mr. Jabez Wilson, equí presente, tuvo la bona idea de visitame esta mañana, y comenzar una historia que promete ser de les más singulares que yo tengo sentío en munchu tiempu. Vusté sintióme señalar que les coses más estrañes y úniques tán davezu venceyaes non a los crímenes más grandes sinón a los más pequeños, y a les veces, de fechu, a aquellos onde puede inclusive duldase si se cometió crime dalgún. Hasta onde yo lu sentí, ye imposible pa min dicir si nel casu presente hai un crime o non, pero'l desendolcu de los eventos ta de xuru ente los más singulares que yo tengo escuchao. Quiciás, Mr. Wilson, podría vusté tener l'amabilidá de recomenzar la so narración. Pído-ylo non namás porque'l mio amigu Dr. Watson nun sintió la parte primera sinón tamién porque la naturaleza peculiar de la historia faime naguar por oyer cada detalle posible de los sos llabios. Como regla, cuando siento cualesquier indiciu mínimu nel cursu de los socesos, soi quien a guiyame pelos milenta casos asemeyaos qu'aprucen na mio alcordanza. Nel casu presente véome forciáu a almitir que los fechos son, hasta onde yo sé, únicos.

El cliente corpudu hinchió'l pechu con daqué arguyu y sacó un diariu puercu y engurriáu del bolsu interior del abrigu. Mentes él observaba la columna d'anuncios, cola cabeza inclinada y el diariu espurríu sobre la rodía, eché una bona güeyada al home y fixi, siguiendo la costume del mio compañeru, por lleer los indicios que podríen apreciase na so ropa o apariencia.

Nun saqué mucho, por embargu, de la inspección. El nuesu visitante trayía tola traza de ser un comerciante británicu mediu: obesu, pomposu y tochu. Gastaba unos pantalones farxolos de pastor a cuadros, un levitu prietu non mui llimpiu, desabrocháu per alantre, y un xilecu esvaíu con un cadenetu de llatón y una pieza de metal cuadrada y afuracada, qu'escolingaba como ornamentu. Un sombreru frayáu y un abrigu pardu destiñíu con un cuellu engurriáu de terciopelo taben echaos sobre una siella al llau d'él. En conxuntu, según lu vi, nun había nada llamadero nel home sacante'l so llapante pelo azafranao, y la espresión d'esmolecimientu y descontentu estremos que trayía na cara.

El güeyu rápidu de Sherlock Holmes captó la mio xera, y sacudió la cabeza con una sorrisa al decatase de les mios güeyaes inquisitives: -Acullá de los fechos obvios de qu'él fixo alcuando trabayu manual, de que toma rapé, de que ye un masón, de que tuvo en China, y de qu'escribió muncho últimamente, yo tampoco nun soi a deducir más nada.

Mr. Jabez Wilson soalzó nel sitiu, col índiz sobre'l diariu, pero colos güeyos nel mio compañeru.

-¿Cómo, pol nome de Dios, sabe vusté tou eso, Mr. Holmes? -entrugó-. ¿Cómo supo que yo fixi, por exemplu, trabayu manual? Ye verdá como l'Evanxeliu, porque yo entamé como carpinteru de barcos.

-Les manes, mio señor. La vuesa mano drecha ye un cachu más grande que la izquierda. Vusté trabayó con ella, y los músculos tán más desendolcaos.

-Bono, ¿y el rapé, entós, y la masonería?

-Nun voi insultar la vuesa intelixencia esplicándo-y cómo saqué eso, sobre manera cuando, escontra les regles estrictes de la vuesa orde, vusté usa un anfiler de corbata con un compás y una escuadra.

• Temas
• Alitar Asturies