La reina la guapura, n'asturianu

Una pieza contemporánea que'l so adaptador a la nuestra llingua defín como «cruel, divertida, mui movida, un poco Tarantino a la irlandesa en versión asturiana». Inmaculada Rodríguez, Izar Gayo, Carlos Alba y Diego Lombardía integren l'elencu d'esta producción que podrá vese los díes 21 y 22 d'agostu nel coliséu xixonés.

Ópera prima del dramaturgu y cineasta angloirlandés, McDonagh, 'La reina de la guapura de Leenane' considérase la cimera espresión del so teatru de la crueldá y entama la triloxía que completen 'La calavera de Connemara' y 'El solitariu oeste'. En 1999 representóse la primer vez n'España dirixida por Mario Gas y de magar foi conociendo delles versiones en catalán, gallegu o eusquera. Anguaño ta en cartelu una nueva adaptación empobinada por Julio Manrique.

El proyectu de llevantala nes tables n'asturianu yera un allampiu que Nun Tris llevaba cuantayá mazcabando y la idea orixinal yera xuntala a rodar col testu de Segio Buelga 'L'abellugu', siguiendo una esperiencia asemeyada del Centro Dramático Galego. A la fin, nun pudo llograse, pero sí tirar alantre cola adaptación de Martin McDonagh, qu'agora ufierta-y a la compañía xixonesa cola so puesta nel Xovellanos: «La posibilidá de facer teatru con toles lletres, después de tar avezaos o condergaos a les producciones de formatu pequeñu o animación. El gustu de poder trabayar una obra como esta ye impagable, dalgo que pa nós tien un calter cásique terapéuticu», apunta.

L'acción del drama trescurre en Leename, un pueblín del condáu de Galway, onde dos muyeres, Mag Folan y la so fía Maureen, conviven nel mesmu llar nuna relación opresiva y conflictiva, sobremanera pa la segunda, que a los sos cuarenta años cumplíos ve escapase el futuru nuna vida ensin nengún horizón. La llegada d'un vieyu amigu y el so amigu va trestocalo too, ufriendo-y a Mauren una regaya onde enfotase en fuxir. Pa Caamaño el testu de McDonagh fala «d'una sociedá muerta, ensin más salíes pa muchos que la emigración, la violencia o l'amargura y que l'autor trata dende un humor despiadáu y fondu».

L'actor considera que les asemeyances cola Asturies contemporánea «fáense evidentes porque somos una sociedá amortecida na que la xente paez que namás piensa en cómo marchar d'equí lo enantes posible y después sí, con munches ganes de volver pa la folixa y la espicha y dicir que son más asturianos que'l que lo fundó». Nesi sen, revela que «la nuestra versión respeta dafechu l'orixinal a nun ser dalgún detallucu y lo que cuenta ye perfectamente tresportable a equí. Si pones Carbayín o Turón en vez de Leenane, valdría lo mesmo», caltién el so adaptador.