Una poeta que xunta toles sensibilidaes

La concesión a la poeta Lourdes Álvarez del III Premiu Nacional de Lliteratura Asturiana promovíu pola Academia de la Llingua, amás de reconocer la trayectoria de la so autora, parez tener suscitao una aprobación unánime ente los sos compañeros y compañeres de lletres de la que son una amuesa les opiniones recoyíes por EL COMERCIO ente dellos autores nel nuestru idioma de diverses xeneraciones.

Asina la escritora Laura Marcos calificaba'l gallardón de «mui merecíu pa una poeta imprescindible na nuestra lliteratura», resaltando que Álvarez: «Tien una voz poética única y bien reconocible pola so sensibilidá pa poner palabres a la esperiencia íntima con tolos sos matices agridulces, una voz totalmente contemporánea y al empar mui conectada a la tierra y al pasáu del que ye heredera; y del fai partícipe a quien la llee». Igual de rotundu s'espresaba José Luis Rendueles al afirmar que «pa mi ye la meyor poeta asturiana» y señalaba ente les sos virtúes «una escritura na que nun sobra nin falta nada y tien una voz qu'a mí llégame. Nun ye d'eses autores de poemes individualmente brillantes si los saques del conxuntu, pero nel so casu dende'l primer llibru al últimu tola obra ye homoxenea y con un tonu escepcional».

Pa la poeta y académica Marta Mori, lo más destacable de la obra de Lourdes Álvarez ye «la sensibilidá, la capacidá d'utilizar figuraciones con una intención simbólica y la musicalidá de los sos versos. Ye una autora que pon munchísima atención nel usu del llinguaxe, coherente en dalguién especialmente esmolecida pola perfección llingüística, l'estilu y los aspectos formales de la poesía». Otru aspectu que recalcaba la estudiosa ye que, «enantes que nos permitiéramos afirmanos como feministes, ella siempre fizo una poesía con voz de muyer, no que güei llamaríamos perspectiva de xéneru, tien una visión femenina del mundu, eso ye bastante claro». Nesi sen tamién considera «mui oportuno el premiu».

Igual de conforme col gallardón s'amosaba'l tamién académicu Pablo Texón: «Parezme mui xustu, Lourdes ye un referente total», y resaltaba nella «una manera nada impostada de tener una voz propia y mantenese fiel a esa llinia a lo llargo de tola so carrera, ye como esi árbol que puede cimblar pero siempre se tien en sitiu. Fai un manexu de la palabra mui plásticu y efectivu, consigue muncha sonoridá a la vez d'una gran profundidá conceptual y tien la capacidá de cola palabra evocar el silenciu. Poques coses se pueden dicir meyor». L'escritor José Ángel Gayol nun tien duldes de qu'Álvarez ye «un de los nomes mayores de la lliteratura asturiana». Ente les sos preferencies ta ún de los sos primeros títulos: 'Mares d'Añil': «Un llibru al que siempre vuelvo, exemplar na concisión y nel usu de les palabres, mui propiu y con un lésicu bien afayadizu, mui actual. A partir d'ehí tien un filu poéticu que xunce tolos sos llibros», opinaba.

Ente les voces más moces, Solinca Turbón espresaba que «la calidá ye independiente del xéneru de quien escribe, pero que seya la primer muyer premiada parezme importante», y destacaba na so poesía «l'intimismu d'una voz con muncha fuerza, mui reconocible y que dexa una pegada mui fuerte. Marcó un camín». Alba Carballo coincidía en señalar que, «si ya escribir n'asturianu ye militar, facelo siendo muyer ye militar doblemente. Por eso veo un pasu importante que se reconoza la obra de Lourdes Álvarez, un de los nomes que tienen que salir na historia de la lliteratura asturiana». De la so poesía emponderaba «que ye accesible a cualquier llector pola forma d'espresase y porque trata temes que son comunes a les esperiencies de cualquier ser humanu».

Lapidaria y segura amosábase igualmente la escritora Ángeles Carbajal: «Una voz con personalidá mui especial, una sensibilidá esquisita y una autoesixencia enorme. La de Lourdes ye una escritura d'una honestidá y una profundidá mui poco usuales. Tamos falando d'una poeta de les que se ponen con lletres mayúscules».

• Temas
• Alitar Asturies