Igor Medio, ente'l talentu y el compromisu

La 43 Selmana de les Lletres Asturianes qu'entama la Conseyería de Cultura del Gobiernu del Principáu pon el focu esti añu en Ígor Medio (1971-2006), un creador orixinal qu'a lo llargo de la so breve ya intensa vida dexó bona amuesa de la bayura del so talentu nes dos disciplines artístiques que cultivó activamente valiéndose de la ferramienta espresiva de la llingua asturiana: la música y la ilustración gráfica.

Nacíu nel barriu xixonés del Natahoyo, Medio escomenzó a dibuxar de bien neñu, una actividá que diba compaxinar cola música. En 1991, mientras cursa Belles Artes en Salamanca, funda con Ruma Barbero, el grupu Felpeyu. La guitarra y la mandolina fueron los sos primeros instrumentos, inda diba acabar empobinándose al bouzuki y creando escuela nél. Les sos inquietúes por buscar nueves sonoridaes lleváronlu a formar col so compañeru de Felpeyu, Lisardo Prieto el dúu DRD col que grabaron el discu 'Dual' (2005). La madrugada de la nueche de San Xuan de 2006, la so vida y la del so collaciu de banda Carlos Redondo frayábense tráxicamente nun accidente de tráficu n'Álava mientres viaxaben camín d'un festival en Calaf (Barcelona). Como historietista, la so obra más popular foi la saga 'La Familia Castañón', aniciada en 1997.

Los actos ábrense el martes 3 de mayu a les 12 del meudía nel paraninfu de Llaboral Ciudá de la Cultura cola presentación de la obra conmemorativa: 'Igor Medio El carbón y l'arena', y la proyección del documental 'Onde soi quien quiero ser. Una semblanza d'Ígor Medio'. A les 18 hores nel Muséu Barjola abrese la esposición 'Xente llano de Xixón. La obra gráfica d'Ígor Medio' con una 'jam session' na que van participar Alberto Ablanedo, Rubén Bada, Pepín de Muñalén y Dolfu R. Fernández.

El miércoles 4 a les 20 hores nel Teatru de La Llaboral va entamase el conciertu homenaxe al músicu y dibuxante xixonés con Felpeyu y integrantes de Tuenda, DRD, La Bandina'l Tombo y Corquiéu, acompañaos por José Manuel Tejedor (gaita), Mapi Quintana (voz y contrabaxu), Bree Delian (cordión), Alberto Sánchez (flauta), Xuan Nel Expósito (cordión), Castor Castro (flauta), Toño Gómez (vigulín), Xel Pereda (voz y guitarra), y Isidro Suárez (flauta). El xueves, la música cambia de palu pa treslladase al Auditoriu Príncipe Felipe n'Uviéu col 'Conciertu de les Lletres Asturianes' a cargu de la Orquesta Sinfónica del Principáu d'Asturies (OSPA), dirixida por Daniel Sánchez Velasco y con un programa qu'inclúi: 'Concierto para violín y orquesta' de Daniel Sánchez Velasco, 'Tribute to Richard Estes' de Juan Méndez y 'Córdoba en un sueño' de Raquel Rodríguez, actuando como solista Héctor Corpus (violín).

El mesmu Día de les Lletres, el viernes 6 a les 18.30 nel Muséu Barjola de Xixón, piésllense los actos cola mesa redonda: '¿En qué andaría Ígor? El comic asturianu güei', moderada por Chechu García, con García Raquel Lagartos, Ruma Barbero y el collaborador d'EL COMERCIO Ernesto García, 'Neto'.