Guipando a Igor Medio

Plantégome si soi carne podre y barato nesti mundiu nel que entá nun ta normalizao el nun dixebrar lo revolucionario de la llárima, esi aseñardar que bien nun nos deprenden na escuela y que sí dexare Igor. Cuando decidí de la mano d'Ambás ya Inaciu Galán entamar esti proyectu, Ruma Barbero y Sonia Tuya abriéronme les puertes a so casa, al mesmu tiempu que desenllordiaben una bandera blanca na guerra que tinía conmigo mesma por nun saber respetar que ta bien nun tener raigaños fundamentaos no que consideramos 'tradi', deprendiendo a vivir ensin tener que cruciar miraes col (yá amigu) conceutu d'asturianismu. Igor fizo de lo nueso viñeta, y de lo académico perendengue, como si too dependiere d'un bouzuki, porque como yá me dixere Nicolás Bardio: «Y si sal mal, ¿qué?».

Esta actividá basada nel trabayu de campu fechu de manera previa al desendolcu de la mesma, fízome respondona y crítica col tán intocable 'folk', porque 'Guipando a Igor Medio' nun ye más qu'un intentu d'averar de mena segura la cultura asturiana a los qu'entá tán por llegar, a les tiestes que'l díi de mañana van decidir si les páxines van ser magaya, si la música ye bailladera o si paga la pena caltener la tinta, porque ye xustu nesi momentu (cuando conocen a Igor), cuando se dan cuenta de qu'Asturies nun muerde, que nun fai falta caltener un apellíu p'abrir el so mundu interior a lo que güei conocemos como país. Per otra parte, prestaríame aprofiar qu'esti taller ye un espaciu seguru escurríu pa desenvolvese nos centros educativos, siendo ehí onde tendría que tener cabida la mayor parte La Selmana de les Lletres, porque la finalidá ye faer lo que bien faía Medio, caltener y normalizar (refiriéndome al asturianu, non a la discriminación llingüística, que sicasí sí ta normalizada).

Mentanto Lluis Fanjul y yo vamos xubir al coche, y diremos a por l.laranxes acullá Balsera.