Burbús, tradición y vanguardia de munches fuentes

Una manera distinta d'abordar la tradición del país y de reinterpretala dando aliendu a la llibertá creativa ye l'enfotu col que nació va poco más d'un añu el grupu Burbús. Entamáu alrodiu de dos profesores de la Escuela de Música Tradicional (EMT) Villa de Xixón, el gaiteru y flautista José Luis García xunta'l vigulineru Juan Diego Gómez, axunta na so formación a otros tres miembros de llarga y estremada trayectoria: José Martínez (Ún de Grao) a la voz y a la guitarra, Ginés Fernández nel curdión y Javier San Marcos al baxu, chelu y coros. El prósimu sábado 28 de mayu debuten en vivo con un conciertu nel salón d'actos de l'Agrupación Artística Xixonesa nel que van presentar una parte del repertoriu nel que lleven trabayando dende la so xuntanza y del que van grabar en fecha inminente un EP con tres temes.

«Venimos de diferentes ámbitos: folk, clásico, rock, jazz, etc. y el puntu que nos xune nesti proyectu ye partir de la música tradicional pero non de la manera habitual que se vieno faciendo n'Asturies sinón enfocándonos a un llugar bien alloñáu d'estilos o etiquetes concretos, coles llendes qu'imponen, p'amosar un repertoriu con sellu propiu, frutu de los nuestros particulares gustos y de la esperimentación cola que damos forma a los temes, seyan de la tradición o composiciones del grupu», desplica José Luis García. El resultáu d'esti propósitu puede escuchase nel primer cantar que llanzaran nes plataformes dixitales col videoclip realizáu por Sara González. Trátase de 'Caldueñu', una xota popular que Burbús fai suya pa esplorar les posibilidaes qu'apurre a un son perconocíu el puxu d'una armonía disonante. L'otru tema desveláu apocayá nel programa Pieces de Tpa, 'La danza Santana', deconstrúi dende un empiezu fiel a l'alcordanza de la versión que nel so día fexo Llan de Cubel pa dir envolviéndolu nuna suxestiva atmósfera d'inesperáu remate. «Préstanos xugar con sonoridaes mui variopintes, mesmo con pasaxes d'una cierta dureza, porque creyemos que como pasa na vida, dientro de la dureza o la fealdá de les coses hai tamién guapura», apunta García. La mestura de ritmos y raigaños poco avezaos na música asturiana de raigón, del blues a los esquemes clásicos o la experimentación marquen d'igualmiente la personalidá de Burbús.

El gaiteru y flautista de la banda resalta l'acoyida cola que tan siendo recibíos estos adelantros del so repertoriu: «La verdá ye qu'hasta agora lo que nos llega ye un fondu interés de la xente y lo más prestoso ye que nun provién en xeneral de persones venceyaes al mundu del folk, sinón mui variáu y esi ye ún de los nuestros camientos, algamar non a un públicu determináu sinón a cualquier públicu que-y pueda gustar lo que facemos». Nesi sen, caltienen les sos espectatives nos dellos conciertos que ya tienen zarraos de cara'l branu y onde allampien tamién poder rodase en directo colos temes trabayaos.