«Na música tradicional hai muncho postureo»

Rara avis ú les hubiere de la escena musical asturiana y ún de los sos creadores más inquietamente activos, el piloñetu Maxi Areñes ta a piques de llanzar nes prósimes selmanes el nuevu discu de Fontoria 'Goetia'. Axunta nél siete temes, cinco instrumentales y dos cantaos de los que ya ta sonando como adelantru 'La partida', coles voces del tríu llangreanu de pandereteres 6 Riales. De son lluminosu y lletra enxugada d'hermetismu, el single ye una sorpresa más de les munches y bien diverses qu'igüen un trabayu que'l mesmu artista califica con sincera retranca de «non fechu pa toles oreyes, solo pa les mui escoyíes».

Dende'l so abellugu d'Areñes, el músicu respuende paciente y posáu que 'Goetia' «ye un de los llibros menores de 'Les clavícules del Rei Salomón', onde se cuenta que retuvo a una cohorte entera de demonios y púnxo-yos un sellu pa que trabayaren pa él. Dizse que'l so famosu templu llevantólu gracies a estos demonios. Y na Edá Media, col auxe de l'alquimia, llamábase Goetia al procesu d'abrir les puertes ente'l mundu visible y el mundu de los seres invisibles. El discu va perhí, pela relación ente esos seres de los mundos invisibles y nós».

Cuartu album nos cinco años d'esistencia de Fontoria, tres 'Nordés' (2019), 'El máxicu viaxe de Fiona de Morlay' (2020) y 'Sirio' (2022), el compositor y multinstrumentista encueye los costinos cuando se-y plantea si se considera un artista prolíficu: «La creatividá ye asina. Yo tengo un problemón que ye la mente que tengo, una especie de maldición. A mi dame igual que la xente lo escuche, se venda o nun se venda. Componer y grabar discos ye una manera de soltar la creatividá y espresame, pero nun lo faigo pa naide, ye vital pa mi», asegura. Nesti casu, después de resaltar que se trata del primer discu nel que nun pon la so voz (xunta el tema interpretáu por 6 Riales, Marco Martino canta en 'Sardea'), desvela que'l corte col que s'abre y da títulu al álbum «ye un paséu nel que van abriéndose eses puertes a los mundos invisibles, y si l'anterior, 'Sirio', yera tecnoloxicu y futurista, esto ye mas suavino dientro la complexidá, una pastoral na qu'hai reminiscencies dende los Genesis con Peter Gabriel, Sibelius, Debussy». Respective a los otros temes instrumentales, apunta que «en 'Eolo 1' hai una mezcla de folk, rock, rock duru, ondes de neoclásicu. N'otru tema, 'La cueva de cristal', tuve interactuando con percusiones d'orquesta y hai notes de marimba, y el que dedico al poeta William Blake ye una paranoia con una voz recitando n'inglés 'The Tyger' y alredor unes percusiones y unos teclaos. Ye una paranoia necesaria pa esti discu que me petecía facer».

Nes collaboraciones, Areñes cuenta equí coles bateríes de Luis Arnaldo y el multinstrumentista Pablo Canalís, colos qu'afirma compartir «un conceptu de facer música mui similar». El compositor amuésase sobremanera contentu de tener grabao coles componentes de 6 Riales: «Prestábenme muncho, fue una maravilla, son unes neñes mui humildes y parezme que tán mui lloñe d'esi glamur que se-y pretende dar nestos tiempos a la música tradicional, de toos esos divos y dives que tanto me repateen», espresa con tola sinceridá. Enemigu de les etiquetes -«Fontoria llévase mal con eso-, apunta: «Sorpréndeme que fuera d'Asturies y d'España nos circuitos de música progresiva ta meyor considerao qu'equí. La verdá ye que nun tuvimos de moda nunca, nun lo tamos y espero que nun lo teamos enxamás. Nun faigo música pa bailar, ye pa sentase y escuchala. La música ye pa eso, anque olvidósenos un poco».

Cola franqueza que siempre lu definió, Areñes ufierta una visión poco complaciente col momentu actual de la nuestra música: «Agora mesmo, en xeneral veo muncho postureo, igual ye dalgo xeneracional y dizlo un puntu al que lo último que-y apetez agora ye facer un discu de folk puru. Veo muncha pose y muncha moda. Parezme perfecto qu'haya xente descubriendo qu'esisten les panderetes y el baille tradicional, ta mui bien qu'haya movimientu y préstame pola vida, pero creo qu'al final va haber una criba natural, oxalá m'enquivoque. Si dalgo debiera ser la música tradicional de cualquier pueblu, esto dígolo en serio, tien que ser honesta. Y, dientro d'esi planteamientu, non tolo que se ta faciendo lo ye».

A finales de mes va poder escuchase ya enteru 'Goetia'. En cuantes a la so puesta en directu, Areñes revela que «dar conciertos nunca me prestó y cuanto más vieyu, menos, pero toi arreglando una banda pa presentalo en xuno en Mieres y facer tamién un repasu a los temes anteriores».

• Temas
• Alitar Asturies