Llectures pa disfrutar al fresquillín del branu

L'académica de la Llingua y presidenta de l'Asociación d'Escritores d'Asturies, Esther García López nun tien duldes en recomendar´Cuando los dioses se pierden na nublina' (Hifer, 2019) de Roberto González-Quevedo: «una ficción del sieglu XXI que s'ambienta na zona occidental, en Pesicia, un llugar imaxinariu al que me siento mui venceyada. Son interesantes les alusiones a ciertes celebraciones y mitos relacionaos col cristianismu nuna obra d'abonda guapura», desplica.

Un dietariu, 'En primera persona' (Trabe, 2019) de José Ángel Gayol, ye la propuesta del poeta Héctor Pérez Iglesias: «Foi una de les llectures que me paecieron más interesantes de les qu'atopé n'asturianu. Pol so calter diarísticu ye bien variáu en temática, asuntos y reflesiones, un d'esos llibros que puedes abrir per onde quieras y escritu d'una manera amena, inda tamién con fondura».

L'escritor y collaborador de EL COMERCIO Miguel Rojo dulda ente dos títulos, a los qu'afirma «siempre recurro y toi volviendo»: 'Les manes enceses' (Saltadera, 2014), la estensa antoloxía bilingüe del portugués Eugenio d'Andrade fecha por Antón García, «tanto pola poesía orixinal como la de les curioses versiones», ya 'Historia Universal de Paniceiros' (Saltadera, 2018) de Xuan Bello, que «marcó un enantes y un después na narrativa asturiana, un clásicu absolutu».

Inaciu Galán apuesta pola mesma novela que recomendaba va unes selmanes el presidente del Principáu, Adrián Barbón: 'La colomina 36' (Trabe, 2020) de Nicolás Bardio: «Nun sé si por esi motivu pero ta claro que ye'l llibru del momentu agora y ta teniendo munchos llectores: ye una bona llectura mui apropiada pal branu, entretenida y bien amañosa. De xuro que puede gusta-y a cualaquier persona».

La poeta Ángeles Carbajal opta por una obra del xéneru qu'ella mesma cultiva: 'P'anular los adioses' (Trea, 2018) de Lurdes Álvarez: «Una autora absolutamente extraordinaria con una obra llarga, intensa y na que nun hai un solu versu fallíu. Nesti llibru ta l'oru puru de la so poesía, que ye d'alta intensidá, onde solo lo más auténtico, veraz y fondo tien cabida», argumenta.

Vicente García Oliva, un de los nomes fundamentales de la primer xeneración del Surdimientu y ún de los más activos, encamienta, como la so collacia d'Academia, Esther García, una obra de Roberto González-Quevedo: 'Los crímenes de Pumarín' (Hifer, 2019) «un relatu bien prestosu, caltién munchos xuegos pal llector y nel filu de la historia hai un poco de too: vida universitaria, crimen y cotidianidá. Una novela mui refrescante pa esti tiempu», defende.

El poeta Pablo X. Suárez decídese por 'Nel ríu de la fame' (Saltadera, 2015) de Pilar Arnaldo: «son narraciones que te lleven a una realidá inda cercana al través de la figura de la muyer rural, que tuvo silenciada de dalguna manera. La llingua qu'usa nun ye nada enguedeyada y faise asequible a tou tipu de llectores».

L'últimu títulú úfrelu una autora de les promociones más moces de les nuestres lletres y failo cola novela 'A estaya' (Impronta, 2019) de Sidoro Villa Costales: «Ta escrita nun asturianu mui cenciellu pa quien quiera aniciase lleendo nel nuestru idioma y ye bramente mui entretenida, con abondo humor y puntos que van facer rise bastante al que se meta nella».