Campus Mieres

Les hestories d'esta tierra repítense más que la cebolla. Siempre se dixo y dixéralo nun poema Ángel González. Agora mesmo la hestoria ésta de llevar Inxeniería de Mines pa Mieres. Cuando yá nun hai mines. Cuando yá malapenes queden cuatro gatos estudiando Mines. Una hestoria que yá vien d'atrás. L'alcalde d'aquella n'Uviéu, que yera inxenieru, tenía-y unes ganes tremendes al solar d'Inxeniería de Mines. Dáivos cuenta: en plena cai Independencia, d'espaldes al Hotel de la Reconquista. ¡Cómo pa nun querer utilizar esi espaciu y mandar a los cuatro gatos pa Mieres! Que d'aquella igual yeren cinco, tovía. Pero, ¡ai, maminina! ¡Depués de dios, los inxenieros! La qu'armaron. La que siguen armando. A ver quién los saca d'ellí. Y, amás, pa dir pa Mieres. Pal extrarradiu. Pa Les Cuenques. Y pa esa mierda edificiu, gris como toes Les Cuenques, que ficieron. Que nun tá en Mieres siquiera. A les afueres. Nel Polígonu. Cosa de los sindicatos. Un pelotazu más que sumar a los de la época. Cosa de los políticos aquellos que poníen los sindicatos. Y siguen poniendo. Y creíen que mandaben dalgo. Y lo siguen creyendo. Y claro que lo mandaben: mandaron facer un Campus de mierda que nunca valió pa nada. Grandón y féu. Eso sí, a xuegu con tolo demás. La risión d'Asturies entero. En primer llugar, per delante de toos, la risión de los inxenieros. Riéronse entós. Ríense agora.

Pero, la verdá, ¿quién quier que venga Inxeniería de Mines pa Mieres? Yá sabemos que los inxenieros non. En Les Cuenques tampoco naide los quier. Pola razón que quieras. Porque yá nun hai mines. Polo que representaron tola vida los inxenieros. Porque ye una carrera que yá nun pinta gran cosa. Y, pa lo que pinta, sigue tando meyor n'Uviéu que ye un llugar que tampoco pinta gran cosa. Vese polos comentarios de los ilustres políticos carbayones. Que son como los de Mieres diciendo tonteríes. Ignacio Cuesta, el rapaz de Ciudadanos, diz que ye indisociable l'asociación ente la Escuela y la ciudá. Y, pa colmo, créelo. Como lo que diz Cristina Coto, la nena de Vox. Que, la verdá, como si nun dixera nada. Que cada vez recuerda más a Ana Taboada, la de Podemos. ¡Que más-yos dan los inxenieros! Si nun hai inxenieros de Vox. Y menos de Podemos. Los inxenieros son d'ellos mesmos. Como l'alcalde d'agora d'Uviéu, que nun necesita ser inxenieru porque ye de Teberga. Y los teberganos sí que somos de nosotros mesmos. ¿Que la Escuela se va? ¡Qué maravía! ¿Qué la Escuela se queda? ¡Qué maravía!