Pancho Villa (2)

Namás salir na prensa la foto del hermanu de les dos güeles míes, Alfredo Álvarez Arias, xunto a Pancho Villa y les sos tropes, el so hermanu Bartolo, residente en Cuba, llamó urxente a otru hermanu, Narciso, y púnxolu al día de les nueves que-y llegaben. Narciso, como hermanu mayor, dixo que diba tomar cartes nel asuntu. Llamó a un amigu empresariu, natural de Ponga, pa que lu acompañara hasta'l norte de México, llugar nel que tenía negocios. Y asina, a bordu d'un biplanu Curtis JN-3 Jenny, propiedá del empresariu, blincaron de La Habana a Mérida, nel Yucatán; d'ellí a Veracruz y dende ésti a Monterrey, nel estáu de Nuevo León; pa dir directos dende ellí a Chihuahua.

Aquello taba en pie de guerra y menos mal que'l ponguetu tenía bonos contactos en tolos llaos. Alfredo siempre contó que lu secuestraran; pero, aína, desplegando les sos dotes d'encantador de serpientes, mintiera diciendo que fuera sarxentu instructor del exércitu español y que «por contribuir a la revolución» (palabres d'él) podría encargase de la instrucción de los nuevos reclutes que llegaben del campu y nun sabíen nada de formaciones, avances, repliegues y disparos.

Cuando lu localizó l'empresariu de Ponga, comprobó en nada que, a poco que lu dexaran, ascendía a comandante. Y asina-y lo fizo saber a Narciso que vio nello una oportunidá pa que l'hermanu pudiera ser dalgo na vida. Con estes, empresariu y Narciso presentáronse a la plana mayor de Pancho Villa y dixéron-y que veníen pagar el rescate d'Alfredo Álvarez Arias. Pero con una condición: debíen mantenelu con ellos un par d'años, polo menos, p'haber si asina sentaba la cabeza y se facía un home, como se dicía d'aquella.

A la revolución, naquellos momentos, veníen-y bien les perres. Y con elles, Alfredo pasaba a constar como alistáu voluntario a la tropa. Él namás s'enteró que quedaba oficialmente incoporáu a la tropa de Pancho Villa en calidá de sarxentu instructor. Como si d'un serviciu militar se tratara. Duración aproximao: dos años. Qu'al final s'acabaron convirtiendo en cinco porque la cosa duró hasta 1916.

En 1914 Narciso fizo por enterase si Alfredo acompañaba a les tropes de Pancho Villa cuando entraron en Ciudad de México. Pero, de tolo más que supo ye de qu'andaba encargáu del suministru d'armes en Chihuahua, ande aportaben los traficantes americanos del norte con pocos escrúpulos. En 1916, de la que tolos periódicos del mundu falaben de la invasión mexicana a los Estaos Xuníos y la posterior entrada d'un exércitu de diez mil soldaos americanos detrás de Pancho Villa, Narciso decidió meter mano nel asuntu y volver a México a sacar como fuera al so hermanu. Pero esta ya ye otra hestoria.

• Temas
• Alitar Asturies