

Secciones
Servicios
Destacamos
Autor de títulos como 'L'aventura de Mhino' (2008) y 'La maldición Llucescuria' (2012), Abel Martinez (Uviéu, 1976), que propuso nun salir na foto y dexar intrigaos a los sos llectores, ta acabante publicar la novela 'Vikingos 2035' (Radagast), una ficción post-apocalíptica ambientada nes ruines d'una villa marina asturiana.
-¿Qué cuenta nesta narración?
-Ye una historia de xéneru distópicu. Hai un fin del mundu y a diferencia de lo que ye avezo nesti tipu de relatos, afuxo de cayer nos tópicos d'un mundu terrible onde manda la llei del más fuerte. Equí ye un grupu de persones que nuna villa pequeña entamen a organizase ente ellos. Depués ta la parte que nun se puede revelar y que da títulu a la obra.
-¿Puede desvelar dalgo más ensin estripala?
-Hebo una catástrofe qu'en nengún llau del llibru se desplica esactamente en qué consistió. Sábese que nun momentu determináu empezaron cayer bombes, incendióse too, cayó la rede llétrica, morrieron les persones a palaes, quedaron unos pocoñinos supervivientes que desarrollen una enfermedá y asina escomienza. Lo que pasó realmente queda pa una segunda parte.
-Xuega nella col nome del llugar onde la asitia: L.lubarca y cola llienda de la Reina Lupa...
-La verdá ye que me peteció ambientala en L.lubarca, como ponía L.luarca el Padre Galo y d'ehí salía lo del Arca de los L.lobos, pero nun sabía nada de la llienda. Topéla después de terminar la novela. Pasó tamién cola guerra d'Ucrania, hai xente que me pregunta si ta inspiráu nella esi escenariu tres una guerra destructiva y el casu ye que cuando estalló esi conflictu, ya la tenía escrita. Son casualidaes de la vida.
-¿Igual ye porque el mundu cada vez se parez más a una ficción distópica?
-Claro. La novela puede parecer mui fantasiosa pero lo que cuenta ye dalgo que puede suceder mañana mesmo. Hai una tormenta solar, un colapsu lléctricu y d'un día pa otru esto acaba nun desastre asemeyáu. Asina que tamién puede ser una historia realista. Yo escoyí el xéneru porque ye'l que me presta lleer y escribir.
-¿Cuáles seríen les sos referencies na ciencia ficción o la fantasía?
-El mio llibru favoritu ye '1984' d'Orwell, pa mi ye lo más y anque supuestamente ye una novela infantil, tamién 'Momo' de Michael Ende, nel que cada vez que lu vuelvo lleer alcuentro más coses que sacar d'ello. Nel ámbitu del comic sería 'V de Vendetta'. Eses son les mios referencies por antonomasia.
-¿A qué cree que se debe'l puxu que ta volviendo a tener esi tipu de lliteratura?
-Llámame l'atención porque, como dicía, son los xéneros que me presta lleer y dende que yera neñu. Si agora hai un montón de xente a la que-y gusta too esto igual ye porque tamos toos un poco fartucos de la realidá y queremos ver otres coses.
-La propia realidá d'Asturies, el so paisaxe de ruines postindustriales y pueblos abandonaos ¿nun s'asemeya ya a un marcu distópicu nel qu'inspirase?
-Sí, ye verdá. Hai ruines industriales que parecen les d'una antigua civilización alieníxena, l'antigu Pozu Olloniego y el cargaderu Les Tolves, ves eses estructures de formigón toes comíes pola vexetación y a mi ye lo que me vien al maxín. De fechu tengo na cabeza histories que suceden nuna Asturies erma que igual salen dalgún día. En 'Vikingos 2035', tamién hai esa L.luarca en ruines. Por supuesto qu'inspira too eso.
-Y la propia lliteratura n'asturiano, ¿cómo ve'l so futuru?
-Una cosa que me presta d'iniciatives como la qu'edita esti llibru ye que publiquen cola intención de que se venda, dalgo que nun me pasó colos anteriores. Parezme interesante que se preocupen más por da-y interés a lo que seya llamativo más que al preciosismu lliterariu. Tien qu'haber pa tolos gustos, pero ye importante qu'esista una lliteratura popular.
Publicidad
Publicidad
Te puede interesar
Publicidad
Publicidad
Recomendaciones para ti
Favoritos de los suscriptores
Esta funcionalidad es exclusiva para suscriptores.
Reporta un error en esta noticia
Comentar es una ventaja exclusiva para suscriptores
¿Ya eres suscriptor?
Inicia sesiónNecesitas ser suscriptor para poder votar.