«Esta ye una historia de corrupción personal y social»

La cafiante muerte de Nicolai Bostov' (Trabe) ye la nueva novela de José Ángel Gayol (Mieres, 1977). Premiada col Xosefa Xovellanos supón un nuevu xiru de tuerca na narrativa del so autor.

-¿Qué quixo contar nesta novela?

-Ye una novela qu'a través del humor retrata un derrumbe moral de los personaxes, individual y colectivu. Ta ambientada nuna villa en procesu de desindustrialización -nun tien por qué ser Asturies-, nesi contestu hai un personaxe que quier organizar un eventu cultural y esi fechu fai desnudar les sos miseries. Ye la historia d'una persona atrapada nel pueblu onde vive, al que ta venceyáu por llazos familiares, d'amistá, profesionales, deldes y nun puede escapar por un sentíu, noble, de la responsabilidá.

-¿Por qué un drama col prisma del humor?

-Ta escrita nesa clave pero hai subtemes que pretenden facer pensar al llector. L'humor ye un dispositivu d'activación de sentimientos que nun tienen por qué ser positivos. Cuando llees 'La conxura de los necios', a midida que vas pasando les páxines hai una desesperanza tremenda: l'humor tien esa capacidá, de divertir, pero puede dar pena el patetismu de los personaxes. Nesti casu quería retratar un momentu nel que'l protagonista ta na encruciyada de decidir si se rinde o continúa.

-Matizaba qu'ende nun tien que vese Asturies.

-Entendí que nun convenía asitiar l'acción nun llugar concretu, podría ser una villa de la cuenca del Rhur o cercana a Liverpool o na cuenca minera asturiana. Nun ye tan importante como reflexar un determináu ambiente de desesperanza y nesi sentíu un llector alemán o inglés va poder identificase perfectamente con esta historia.

-¿La degradación moral ye l'asuntu de fondo?

-Ye una historia de corrupcion personal y social. Falo d'un ayuntamientu y d'una posible privatización de la cultura, como se fai col agua o los servicios sociales. Lo público y lo privao tán nuna simbiosis complicada, después ta la propia corrupción humana, nesto soi bastante cínicu, nun tengo demasiada esperanza nel ser humanu a la hora de xestionar los asuntos públicos pero llega un puntu en que tampoco me molesta, asumo la realidá y anque fuere en forma de comedia apetecíame retratar eso. La realidá son filos que se van texendo ente diferentes poderes -económicu, políticu, social, simbólicu- dientro un territoriu y quería ver lo que salía meciéndolos toos y pasándolos pel cristal del humor.

-La novela vieno a coincidir con otros llibros suyos ¿siéntese un escritor prolíficu?

-Tengo dellos proyectos abiertos, lo que faigo ye dir abordándolos según los momentos, les apetencies y les ganes. Nun soi mui trabayador pesie a lo que pueda pensase, sinón mui constante. Tolos díes dedico una hora a escribir, correxir, etc. Nun ye gran cosa: una páxina al día, seis a la selmana y al final del añu tienes trescientes, eso ya ye un llibru.

-Nos sos diarios ¿el cuadernu siempre ta abiertu?

-Escribir tolos díes un diariu como un exerciciu ximnánasticu, dame la impresión que tien más de satisfacción del ego que de busca del interés del llector qu'acaba cansáu de que-y cuenten la vida cotidiana d'una persona normal. La mia ye vulgar y prefiero retratar solo aquello que paga la pena el que dalguién llea sobre ello. Los diarios son miraes y lo que puede tener interés más que lo que se ve ye cómo se ve.

-Na so mirada hai una especial atención a la lliteratura asturiana ¿cómo la ve güei?

-Creo que tamos viviendo nun momentu de meseta. Va años fice un articulu 'El don de la invisibilidá' onde me quexaba de la invisibilidá de la lliteratura asturiana y aludía al papel que xugó 'Les Noticies' como focu d'espardimientu de dellos autores y creador d'un ecosistema onde semar la so obra. Güei somos más invisibles.

-¿Por eso dellos autores busquen llamar l'atención?

-Naquel articulu defendía qu'hubiere 'revertes' asturianos, noveles populares, y sigo creyéndolo. La base de too ye la calidá, nun podemos perdelo de vista. Una cosa ye envolvenos nun mantu elitista -necesariu en toa lliteratura- y otro rebaxar el nivel a entretenimientos simplones. Hai un puntu fueos d'artificu en dellos nuevos autores, pero hai otros a los que convién siguir porque tienen el fondu intelectual que puede permitir un percorríu interesante.

• Temas
• Alitar Asturies