«Lo nuestro ye facer les coses a contracorriente»

Con más d'una década de rodaxe y otres dos llargues de los músicos que la componen, La Bonturné ta a piques de llanzar el so álbum 'A contraforga', nueve temes que van ver la lluz a lo llargo d'Abril y que suponen un llabor d'escoyeta bien midíu del so repertoriu y dellos cortes nuevos nuna formación que fuxe de les etiquetes p'afondar nun soníu absolutamente personal. David Varela (voz, curdión y percusiones), Merce Santos (zanfona), Santi Caleya (saxu sopranu y gaita) y David Casillas (contrabaxu) integren la bandina que ya tien adelantrao como single una de les composiciones del discu, 'La Punta'l Boquerón', bona amuesa de la propuesta que van atopar los sos siguidores nesti trabayu.

Varela desplica'l sentíu del títulu que-yos pruyó poner al album con una metáfora: «Trabayar a contraforga vien a ser lo que fai un artesanu de la madera cuando usa la gubia a contraveta y que ye cuando más enfotu tien de poner nel llabor o más vueltes tien de da-y a la fechura de la obra. Ye una espresion que nos define perbién porque lo nuestro ye facer les coses un poco a contracorriente, fuera de modes y temporalidaes, dalgo mui personal y con esi mesmu procuru de los artesanos de la madera». Él mesmu al llau de Santos y Caleya tocaran xuntos bien de tiempu en La Bandina, una agrupación onde ya taba'l xermen del soníu que diben desenvolver en La Bonturné. Daquel conxuntu quedaron auténticos 'hits' de la nuestra música como 'Na caleya' o 'A la vera de Borín'. El curdioneru apunta: «Desque aparcamos La Bandina y entamamos nel nuevu proyectu, nun nos plantegáramos grabar un discu hasta que nun tuviéramos un repertoriu lo bastante uniforme que nos identificara en caún de los temes, inda si rexistramos cosines pa guajes en 'Bestiariu' o collaboraciones como la que fiximos con una versión d'Australian Blonde. Equí queríamos ufiertar una bona escoyeta de lo que facemos».

En cuantes al procesu de selección de los cortes presentes nesti trabayu, el músicu asegura: «Descartamos abondos porque teníamos claro que nun queríamos 'forrar' el discu y fuimos aportando propuestes de tou tipu que después triamos pa da-yos el nuestru enfoque armónicu y melódicu propiu, con matices y testures un tantu denses. A la fin creyemos que quedó bastante redondu y mui fiel a lo que nos define y lo que nos presta». Ente los nueve cortes de 'A contraforga', siete son instrumentales y dos cantaos (ún d'ellos, con lletra del escritor Paco Álvarez).

Nellos, Varela señala que «van cásique tres cuartos d'hora de música instrumental amás de los dos temes vocales y hai un pequeñu porcentaxe de melodíes tradicionales, igual un tanto desnaturalizaes, pero fáciles d'identificar. La mayoría son arreglos y composiciones propies, nos qu'abunden los temes llargos con munchu cambiu de sensación y en toos el propósitu de que la xente acabe gastando un poco suela al escuchalos si-yos petez o ven manera».

Distintos al tonu xeneral d'otres bandes asturianes, el so 'frontman' asegura: «Lo que nos estrema ye trabayar con arreglos y testures un poco escuros. Hailos que nos dicen que los treslladamos a los sones de les tierres balcániques, otros que creamos atmósferes teatrales, mesmo oníriques, y los más vieyos asóciennos al soníu de les orquestines de mediaos el sieglu XX, pero lo que más nos presta ye cuando nos dicen los que nos lleven siguiendo d'otres formaciónes qu'esto suena a nosotros. Y musicalmente, como grupu, sabemos que nos late el corazón al mesmu ritmu». Nesi sen, David Varela reconoz como sellu singular «la tímbrica qu'algamamos cola instrumentación de zanfona, curdión, saxo, contrabaxo y la presencia de gaita, voz, dalguna percusión. Y, pola nuestra trayectoria como músicos de raigañu, siguimos nutriéndonos del repertoriu melódicu y vocal de la tradición asturiana, cola única premisa de que seya bailable». Un exemplu significativu d'ello va poder afayase nel discu onde'l fondu ibéricu y européu de músiques populares da forma a xotes, mazurques, foxtrot, valses o scottish y, al llau, reinterpretaciones particulares como la que La Bonturné fai d'una tonada clásica como 'Baxaron cuatro alleranos'.

El discu que ta a piques de salir grabóse nos Estudios Tutu de Corvera con Sergio Rodríguez nos mandos, ye autoproducíu y cuenta col diseñu de Luisa Colado y Javier Lueje. La Bonturné va presentalu en directu nel Teatru Jovellanos de Xixón el prósimu 3 de mayu dientro'l ciclu Encaja2.

• Temas
• Alitar Asturies