Una escena cada vez más al son de la normalidá

La escena musical del país goza de bona salú creativa pero inda hai camín por andar pa que llegue al públicu en condiciones afayadices, emburriada poles administraciones y los medios públicos de comunicación. Esi ye'l diagnósticu que se saca del Anuariu de la Música Asturiana publicáu por Goxe Producciones y nel que se fai cuenta de lo dio de sí'l pasáu 2022. El volume, distribuíu de baldre n'edición en papel y dixital, inclúi un cedé recopilatoriu con diecinueve temes grabaos nel últimu añu que ye por él solu una amuesa significativa de la diversidá d'estilos o sones que marquen el panorama d'anguañu y nel que los nomes de bandes como Dixebra o artistes como Alfredo González combínense colos de Nacho Vegas o Pop Piquiñín.

Los conteníos del propiu anuariu reflexen esa variedá de propuestes qu'equiparen la nuestra música a la fecha en cualaquier otru idioma y ente les 27 producciones anotaes de la collecha pasada -incluyendo grabaciones en lp, ep y singles- constátase lo afirmao nel editorial: «nesti momentu hai de too», rock, pop, folk, tonada, jazz, cantautores, electrónica o rap.

L'anuariu pon el focu en tres propuestes artístiques que tuvieron especial protagonismu en 2022 y entrevista al gaiteru José Manuel Tejedor, amás de los grupos Guieldu y Algaire. Ufierta arriendes una crónica de la participación asturiana nel caberu Festival de Lorient y reportaxes sobre'l remanecer de la escena celta en directu, la música urbana en llingua asturiana, el Premiu al Meyor Cantar o entrambes remembrances de los trenta y cinco años nes tables de Dixebra -banda de la que se reseña tamién el so discu 'Ente la niebla'- y de Los Berrones. Xunta estos conteníos el periodista Damián Barreiro publica un trabayu tituláu 'Nun hai normalización llingüística ensin dives del pop' y al empar un informe que repasa con mirada crítica la política de promoción de la nuestra música. Otres firmes como la del escritor Adolfo Camilo Díaz propón el so particular top de los cantares n'asturianu que mandaría al espaciu y l'investigador etnográficu Alberto Álvarez Peña rescata un romance deprendíu de María González de Trabáu.

Ún de los afayos d'esti Anuariu que más interés puede despertar nos llectores -y que val de complementu amañosu al informe de Barreiro 'Política llingüística vs Música n'Ast'- ye la encuesta que faen a los cabezaleros de los principales partíos y les sos propuestes pa poner en valor la nuestra escena musical. Adrian Barbón (PSOE), Álvaro Queipo (PP), Ovidio Zapico (IX), Adrián Pumares (Foro) y Covadonga Tomé (Podemos) respuenden a cuestiones cómo la de cuálu creen que ye'l papel d'esta estaya de la cultura asturiana, cómo valoren les sos polítiques o qué midíes van incluyir nos sos programes electorales. La primera pregunta, sicasí, val pa romper el xelu y dexa ver los mesmos gustos de los políticos asturianos a los que se pide desvelar el so cantar preferíu. El presidente Barbón tira de llavianesismu y escueye 'Chalaneru', un enclín de barrer pa casa que comparte cola valdesana Tomé a la que-y presta 'Rigu Esva' de Llan de Cubel. Queipo -l'únicu que contesta en gallego-asturiano- confiesa que «me pon os pelos de punta» la 'Marcha de Brañes' y Zapico opta pol primer ésitu de Rodrigo Cuevas: 'Soi de Verdiciu'. La elección de Pumares revela a un fan confesu de Skama la Rede y del so tema 'Díes de barricá'.

Nes respuestes de los candidatos, Adrián Barbón anuncia una llinia de subvenciones específica pa festivales, mientres Covadonga Tomé y Adrián Pumares coinciden na función que había xugar RTPA pa promocionar la música asturiana. Ovidio Zapico resalta la importancia qu'ésta tien na revalorización de la cultura propia y la identidá, mientres Álvaro Queipo demanda un mayor sofitu del gobiernu rexonal: «Non necesariamente con axudas directas o subvenciones, sinón exercendo de palanca pra consolidar el panorama musical d'Asturias».

• Temas
• Alitar Asturies