Dellos apuntes sobre los selvontes

A veces, anque nun sople l'aire, los cipreses abállense solos. Esto ye lo que cuenten los selvontes de cómo llegó'l ciprés a les sos tierres: una mañana, fai muncho, apaecieron nun pedreru de La Borbuyosa los restos frayaos d'un barcu estrañu. Colos retayos del velame que pudieron salvar ficieron fardelos onde se llevaben ablanes y nueces porque al dir comelos depués siempre teníen un tastu mui rico a sal; de lo que quedaba de la proa rescataron la figura d'un cuélebre que llevaron pa la ilesia y a la que dacuando en vez salía-y pela boca una espluma como la que fai la mar al escachar escontra un cantil; les tables fueron mui apreciaes pa facer fuelles de fragua, porque debíen guardar memoria del bativoléu del folaxe y xubíen y baxaben solos. El mástil llantáronlu nuna campa pa facer una vara yerba pero al poco vieron qu'entamaba a echar cañes y que-y salieren raigaños. Esti foi'l primer ciprés qu'hebo neses tierres y d'elli nacieron tolos qu'hai agora pela redolada. Y por eso cuando a veces, en díes ensin vientu y calmos, los selvontes ven cómo un ciprés s'aballa solu, dicen que ye porque hai galerna pa la mar.»

* * *

«[...] De cuando la francesada los selvontes cuenten qu'a munches ánimes de soldaos franceses muertos dio-yos por guardase nes tenades. Son pantasmes tristes, que dacuando en vez asomen la cabeza pela subidera pero si se decaten de que dalguién los ve desapaecen como povisa de yerba nuna rayada de lluz. A veces siéntense los sos sospiros y les vaques paez que-yos respuenden con un berríu suaviquín como queriendo consolalos. Son amigos de los gatos que muren peles cuadres, que de tratar con ellos hasta paez que miaguen con acentu gascón. Dalgunes nueches da-yos por tocar l'acordión, y al ritmu d'esos sones señardosos nun ye raro qu'a dalguna mocina de la casa-y llegue la madrugada baillando pel cuartu abrazada a l'almuhada.»

* * *

«[...] Los Selvontes saben que'l meyor momentu pa cazar xabalinos penatos ye cuando hai lluna enllena: eses nueches son fáciles de siguir peles camperes porque la lluz de la lluna fai que les sos solombres rinchen pela tierra como si arrastraren chatarra. Los xabalinos penatos tienen normalmente mui bon oyíu (sintieron los pitos de los primeros trenes más de cien años enantes de que s'inventaren les llocomotores) y un olfatu mui finu (al fozar pente les pataques perciben l'arume salitrosu de la mar porque les primeres pataques llegaron en barcu dende América cruciando tou un océanu), pero eses nueches ye como si tuvieren los sentíos tracamundiaos, como si los enfilara'l llume llunar, y los Selvontes puen averase ensin que los sientan. Porque pa cazar los xabalinos penatos hai qu'allegase bien a ellos, nun se-yos pue matar a distancia: solo muerren al dibuxa-yos col deu en llombu una estrella de 7 picos; hai quien tamién les dibuxa de 9 picos, porque entós al cocinalo la carne sabe a pixín, y yá se sabe qu'hai xente que ye más de pescáu que de carne.»

* * *

«[...] Dalgunes mañanes apaecen pela xelada marques de pies descalzos, pies pequeñucos como de neños: ye que rondaron los vafietos. Los selvontes estimen en muncho a estos seres invisibles, porque cuenten que cuiden del ganáu que duerme pelos praos de nueche nel iviernu (espanten los llobos plizcándo-yos el focicu, y pa que nun pasen munchu fríu tapen a los xatinos pequeños con cobertores que texen con filachos de fumu que recueyen peles chimenees); tamién les moces y moces casaderos s'encomienden a ellos: a veces nos cristales empañaos de la ventana del so cuartu alcuentren al alborecer escrito'l nome d'aquel que suspira por ellos. A los vafietos solo se los puede ver durante unos pocos segundos, cuando col sol va quitándose la xelada, y ye mui difícil distinguilos, porque son piquiñinos y visten sayes blanques como'l vafu. Si consigues ver ún, el vafietu, enantes de desapaecer como un xirón de vapor que se llevara l'aire, déxate una moneda de plata na mano; esta moneda ye mui apreciada y hai que guardala pa cuando llegue'l branu, porque si la eches nun vasu enfría cualquier bebida al momentu».

* * *

«[...] Cuenten los Selvontes que delles nueches de lluna nueva apaez pelos caminos un caballu blancu al que llamen el pielcu; conozse la so cercanía enantes yá de velu, porque suenen los sos pasos como'l chisporrotiar d'una gota d'agua pingando sobre la chapa encesa d'una cocina. Como ye un animal fuerte y mansu, hai xente con mala intención que lu quier llevar pa la so cuadra, pero al dir montar les clines medren d'esmenu como cordeles que lu enguedeyen y arranca entós a trotiar llevándolu a rastru perdiéndose nes solombres. Dicen que'l so galope ruxe como cuando'l ferreru mete n'agua frío un fierru ingrientu. Sábese qu'a dalguién que nun vuelve a casa de nueche llevólu'l pielcu porque cuando lu salen a buscar alcuentren n'alguna revuelta del camín una ferradura de plata que brilla como una llaparada blanca a la lluz de los faroles. Na siguiente nueche de lluna enllena siempre los hai que creen reconocer nes manches de la lluna dalgún biecu que-yos recuerda al desaparecíu».

• Temas
• Alitar Asturies