Hai que creyer na música como un asuntu de fe

Nós somos sol, semiente y flor,/tu arreciendes a alcanfor;/el ventanal tienes qu'abrir/y de ti mesmu afuxir», asina escomienza 'Fuerces pa bailar' l'últimu adelantru del EP que'l cantautor Alfredo González (Turón, 1981) va publicar pasáu el branu col títulu 'Asuntu de fe' y del que ya diera a conocer apocaya'l senciellu 'Si te pregunten por mi', un tema grabáu a común con Nacho Vegas y el Coru Mineru de Turón. Depués de tres años de silenciu y una pandemia de metanes, El Flacu afronta unos meses bayurosos nos qu'el llanzamientu d'esti trabayu nuevu n'asturianu va xuntase con otru en castellán: 'La insistencia', del que asoleyara en xineru el cantar que-y da títulu. Una noticia bien prestosa pa los munchos siguidores del músicu a entrambos llaos del cordal y una bona amuesa de que la so creatividá sigue más inquieta que nunca pa siguir componiendo col olfatu sollerte a la emoción o a la protesta, un términu hestóricu del que nun refuga.

Dende Tineo -onde vive cola so compañera, la tamién cantante Silvia Quesada-, González admite la llectura en clave de declaración d'intenciones que tienen los títulos d'entrambos discos: «Comparten esa idea de querer creyer na música como un asuntu de fe -como cantar y falar n'asturianu pa los que creyemos nello- y na necesidá d'insistir. Depués d'esta pandemia que nos desfizo a toos y a toes, non namás a la xente de la cultura: ehí tan les cifres de cómo aumentara porcentualmente'l númberu de superricos y el de superprobes, parezme que pa nun rayase hai que tener un poco d'insistencia y d'enfotu en nós mesmos. Anque nun tenemos más remediu que confiar nos demás pa vender discos y entraes, ye fundamental que primero nos enfotemos en nós mesmos, en que tamos equí pa dalgo y que tenemos un destín marcáu», afirma.

Tocante a los temes escoyíos pal so EP 'Asuntu de fe', l'artista turonés deplica que'l difundíu de mano, 'Si te pregunten por mi': «Foi la primer lletra qu'escribí n'asturianu cuando la última fuelga minera, la de la Marcha del Carbón a Madrid: fícela de la que diba nun autobús p'allá pa sumame a esa llucha y nun sé mui bien por qué nun la espublizara hasta agora. Cuando vi el momentu de sacala pensé en Nacho Vegas, tengo muncha amistá con él y parecióme qu'un cantar nesi tonu menor y esa cierta escuridá, aparte d'ideolóxicamente, podía casar muncho con él. La collaboración col Coru Mineru yera más evidente: canté ehí de rapaz, fui codirector y anguaño mio pa ye'l presidente de l'agrupación, asina que too quedaba en casa (rises)». En cuantes a 'Fuerces pa bailar': «Foi una canción que salió d'eses coses que se t'ocurren na ducha. Viénoseme a la cabeza una fras mui surrealista: 'Voi esperate ellí dándo-y parola a un maniquí' y Pablo Texón, que ye un auténticu maestru, ameyorolo, faciendo la lletra entera. Ye un cantar escontra lo rancio, esa ranciura que tenemos agora de los que nos quieren tirar p'atrás tolo qu'avanzamos p'alantre. Nun me gusta nada entamar panfletos, pero esto ta fecho a favor de la oficialidá y escontra la estrema derecha», asegura. La pieza fai honor al títulu y ye bramente movida, un propósitu que'l Flacu aporfió en componiéndola: «Siento una profunda admiración por Paco Ibáñez y tolos que facíen canción protesta dende la dureza, pero creo que tamién hai que facer canción protesta dende'l baile», espresa.

Les otres dos composiciones del discu, previstu pa setiembre, son l'homónimu 'Asuntu de fe': «Ún d'esos medios tiempos de canciones d'amor marca de la casa, aunque tamién puede referise a munches otres coses» y 'Venti años': «Escribíla pa Guadi Galego, pero vi que falaba de mi, diz: 'Yo tamién fui feliz a los 20 años/yera llargu'l camín/nun miraba p'atrás». Fícela cuando cumplí cuarenta años y agora que tengo cuarenta y ún, véola como esa 'media vida' vivida, que dicía Texón. Ye una canción señardosa, melódicamente mui Milanés», detalla. Mentantu, tien cita en Madrid el 16 de xuno con un conciertu na sala Búho Real y ente los planes que tien nes manes revela que «tuve falando con Fruela 757 y Llevólu'l Sumiciu porque apetezme meteme en dalgo d'eso. Creo que la mocedá ye la que tien de falar agora y los que ya cumplimos los cuarenta tenemos d'averanos a ellos a ver si nos maquillen les arrugues» (rises).