Crear un nosotros

El cineasta arranca l'añu nuevu -en verdá ye una continuidá- somorguiáu nos testos del Frente Tipográficu asturianu de los años trenta (Javier Bueno, Juan Antonio Cabezas, Ovidio Gondi, Vega Pico...) y nes imáxenes del Frente d'Arte (Constantino Suárez, Goico-Aguirre, Germán Horacio, Nicanor Piñole, Mariano Moré...), que teníen una esperiencia de lo político tan fonda como'l cine de vanguardia soviéticu de los años venti. Aquel qu'en palabres del maestru Jean-Luc Godard: «Consideraba les imáxenes que pasaban peles sos pantalles como les imáxenes del so destín». Una idea que tamién esplicó Rancière: «Eisenstein, como Vertov, quería facer coincidir el poder d'un mediu d'espresión nuevu col d'una sociedad nueva. El llinguaxe cinematográficu nun tenía que traducir la fe comunista, sinón que tenía de ser directamente una práctica social qu'abriere la construcción d'un mundu comunista». «Nosotros consideramos que lo esencial nel cine ye afitar los documento y los fechos, afitar la vida y los acontecimientos históricos«, escribió Dizga Vertov. Con ello quería espresar que pensaba'l so cine, pesie a la incompresión de munchos, como un «desciframientu comunista de la realidá».

L'oxetivu principal del Frente Tipográficu y del Frente d'Arte yera la construcción y el fortalecimientu del pronome nosotros. Amosar cómo naquellos momentos tráxicos y heroicos les conciencies individuales de la ciudadanía coincidíen colos oxetivos del gobiernu republicanu asturianu. El Conseyu d'Asturies y Llión y les organizaciones polítiques y sindicales de la clas obrera teníen un mesmu propósitu moral: facer la guerra contra'l fascismu, defender el territoriu de l'agresión y, al tiempu, avanzar na construcción d'una sociedá socialista. Foi ún d'esos raros momentos revolucionarios de la historia onde'l gobiernu y una mayoría de ciudadanos teníen realmente los mesmos oxetivos.