El centenariu de la gran Florina Alías

Tres el dramáticu puntu final que punxo la guerra civil a los enfotos de la Xeneración del Rexonalismu, con nomes como los de Fernán Coronas, Pepín de Pría y Pachín de Melás, dende finales de la década de los cuarenta y sobremanera a partir del mediu sieglu escomiencen a difundir les sos obres autores como Constantino Cabal, Antonio García Oliveros o Matías Conde -ésti dende l'esiliu-, a los que van dir xuntándose otros más mozos como'l mesmu Luis Aurelio Álvarez, José León Delestal, Mánfer de la Llera y Llorienzu Novo Mier. Cronolóxicamente son contemporánees d'ellos escritores como María Balbín -la mayor-, Ángeles López Cuesta -otra esiliada- o les que publiquen ya en plenu Surdimientu como María Xosefa Canellada, Eva González o Nené Losada. Esi ye'l contestu de Florina Alías.

Si nos centramos namás nos sos escritos n'asturianu, podemos adicar la buelga nellos de les dos tendencies que calterizaron el llabor de los autores del so tiempu: per un llau, la costumista y folklorizante, mayoritaria nuna dómina marcada pola degradación de la cultura popular y el propiu idioma; per otru, la d'espresión llírica, siguiendo'l camín entamáu por Cabal y que diba ser superáu con más fonda ambición estética por nomes qu'enllacen col movimientu de recuperación llingüística de los 70 y 80, como Novo Mier. Ensin refugar, la parte más festiva de la so xera, ye na de vocación 'culta' onde rescampla'l verdaderu interés d'Alías. En más d'una ocasión tien remembrao l'estudiosu Antón García el venceyu que caltuvo na so estancia en Madrid col poeta Agustín de Foxá y en dellos de los sos poemes, sobremanera nos sos sonetos, acolúmbrase un asemeyáu procuru pol rigor métricu y l'aliendu lliricu que calterizó al autor de 'El gallo y la muerte'.

Ensin ser quien a conectar, como Llorienzu Novo Mier o Mánfer de la Llera, colos enfotos desplegaos polos escritores mozos del Surdimientu, hai que resaltar la so contribución al desenvolvimientu d'una prosa lliteraria na nuestra llingua al través de relatos como los conteníos en 'Señaldaes del Sueve' o na interesante traducción al asturiano que fexo na década de los 70 del clásicu de Juan Ramón Jiménez 'Platero y yo'. El so centenariu puede ser la oportunidá pa redescubrir a Florina Alías, una escritora de méritu qu'ensin dulda requier una mayor atención d'estudiosos y llectores alrodiu de la so obra.