Ámbitu anuncia'l fin de la edición impresa del periódicu 'Les Noticies'

La prensa en llingua asturiana queda estos díes ensin una de les sos principales publicaciones en papel, col anunciu del periódicu 'Les Noticies' de que pieslla'l so formatu físicu, pa siguir en contautu colos llectores namás que na so edición dixital. El númberu 769, que saldrá espublizáu la prósima selmana, será l'últimu que llegue a la so cita selmanal nos kioskos.

El proyeutu editorial entamó n'agostu de 1996, cuando Publicaciones Ámbitu presentaba'l proyeutu de 'Les Noticies' na Feria Muestres d'Asturies. Unos díes depués, el 6 de setiembre, asoleyábase'l primer númberu.

Inaciu Iglesias, editor y primer direutor del periódicu, recuerda la ilusión del entamu, onde «tuviemos qu'aprender trabayando, teorizar practicando y crear onde nun había», a la vez que «inventemos un productu singular -un selmanariu xeneralista n'asturianu- que, en realidá, yera más propiu del sieglu XIX que d'anguaño». L'editor anuncia que l'apuesta del formatu dixital será fuerte pa encarar el futuru: «Son tiempos duros pero, faciendo alcordanza, nun tengo otro qu'una sensación sincera d'arguyu y agradecimientu a tolos que fixeron posible esta aventura irrepetible».

Son munches les amueses de sofitu y tristura pol fin del formatu en papel de Les Noticies y organizaciones como Iniciativa pol Asturianu y la Xunta Pola Defensa de la Llingua Asturiana fixeron públicos comunicaos nos que se reconoz el llabor d'esti mediu nel procesu de normalización de la llingua.