Elexía pol banqueru Maribona XOSÉ LLUIS CAMPAL FERNÁNDEZ

LA obra non recoyida en llibru del avilesín Marcos del Torniello ye tovía d'una enormidá cuantitativa. Entamo güei a rescatar delles composiciones desconocíes del popular vate de Sabugo José Manuel García. Abro boca con 'Recorderis', homenaxe panexíricu a un amigu difuntu, que s'asoleyó'l 8 de mayu de 1920 na páxina tercera del selmanariu 'El Progreso de Asturias', empobináu pol periodista avilesín Julián G. Orbón. Trátase d'una lletanía datada nos caberos díes d'abril y que tien una dedicatoria: «A la memoria de don José Maribona, en el segundo aniversario de su fallecimiento». José Rodríguez Maribona y García morriera, tres llarga enfermedá, na Villa l'Adelantáu el xueves 18 d'abril de 1918 a los 76 años d'edá. Arriendes de conceyal y presidente del Casinu de Villalegre, onde ñaciera, como recuerda Marcos del Torniello, foi cofundador del bancu Maribona y Hermano, asina como de la fábrica Avilés Industrial.

El cuerpu poemáticu del tributu funerariu ye ésti: «Dos años se cumplen hoi / en la medida del tiempo / desque Pepín Maribona, / l'amigo siempre correuto, / dexó de alendar, fartuco / de trabayar con exceso. / Dos años desde magar / que foi derechín al cielo / (pensando piadosamente, / como de veres lo pienso) / aquel amigo entrañable, / como mantega de tienro. / ¿Dos años! Ya fai dos años... / cuando, al faltái el aliendo, / l'espíritu de don Pepe / echó les ales a güelo, / dexando que la materia tornase pal pudridero. / Dos años que se asomeyen / a dos menutos y medio, / en el sentir del amigo / que se complaz, en silencio, / con recordalo, rezándoi / a veces un Padrenuestro... / por el eterno descanso / de sus bondades en premio. // Don Pepe, qu'en paz descanse, / foi en la tierra modelo / de homes de bien, un serrano, / que se alevó, con talento, / desde la choz'al palacio; / desde la nad'a lo imenso; / a home de grandes negocios / desde un humilde llabriego... / sin que tuviés en so vida / un peliquín de soberbio. // La rellumera primera / que la miranon sos güeyos / foi Villalegre, la cuna / del paraíso tarreno, / por la que tuvo don Pepe / un'andechada de afeuto, / cuasi que cuasi tan grande / como el que siempre nel pecho / guardaba pa la muyer / y pa los fíos, contento / de que-i vinieron al mundo / una gocena lo menos. // En la ciodá de l'Habana / en qu'esplegara so ingenio / de rapacico, y durante / los años mozos, el creito / de don Pepín Maribona / medró pa riba derecho / como la espluma nos mares / a los emburrios del viento; / y desd'entós el rapaz / que s'embarcó de pequeño / pa l'otru mundo, n'un barco / de siete palmos y medio, / con el trabayo por norma / y la honradez por criterio, / non tuvo en baxo ni en riba / un peliquín de soberbio. // Tal foi l'amigo de l'alma / de quian, a ratos, me acuerdo / abondes veces al día, / rezándoi un Padrenuestro / por el eterno descanso... / de sos bondades en premio. // Dos años... ya van dos años / en la medida del tiempo, / desque Pepín Maribona, / espeyo de caballeros, / dexó de alendar, fartuco / de trabayar con exceso, / honrando a su Villalegre, / al Avilés de so ensueño, / a la muyer y a los fíos, / que se ufanaba con ellos... / ¿Dos años... desde magar / voló so espíritu al cielo!».